Qoqys máselesi boıynsha jedel jelige bir aptada 376 shaǵym túsken
Zańsyz qoqys oryndary týraly habardyń basym bóligi Almaty (61) jáne Qaraǵandy (41) oblystarynan, sondaı-aq Almaty qalasynan (47) túsken. Azamattardan túsken ótinishterdiń sany boıynsha «bestikke» Aqtóbe (35) jáne Shyǵys Qazaqstan (32) oblystary kiredi.
376 shaǵymnyń 269-y - stıhııalyq qoqysqa qatysty, 107-si - tolyp ketken konteınerler týraly shaǵymdar.
«23 shildedegi jaǵdaı boıynsha, ákimdiktermen birlesip, 132 polıgon joıyldy. Bul baǵyttaǵy jumys jalǵasýda. Shaǵym túskennen keıin aqparat dereý jergilikti ekologııa departamentterine, ákimdikter men ishki ister departamentteri qyzmetterine jiberiledi. Mamandar dereý tekserý ornyna baryp, sol jerde shara qoldanady. Kináliler jazalanady, sonyń ishinde aıyppul da salynady» delingen habarlamada.
Esterińizge sala ketsek, Ekologııa mınıstrligi taıaýda jedel jelini iske qosqan bolatyn. Onyń nómiri - +7 (775) 952-49-00. Bul nómirge WhatsApp arqyly kez kelgen qazaqstandyq óz qalasyndaǵy nemese aýylyndaǵy stıhııalyq qoqystar týraly aqparatty fotosýret pen beınetúsirilim arqyly rastaı otyryp, qoldana alady.
«Biz barlyq turǵyndardy máselege beıjaı qaramaı, jedel jelige óz aýmaǵyndaǵy stıhııalyq qoqys nemese konteınerlerdiń tolyp ketý faktileri týraly dereý habarlap, ózderińiz olarǵa eskertý jasap, polıtsııaǵa habarlasýdy suraımyz. Tek birlesken jaǵdaıda ǵana biz bul salany tártipke keltire alamyz», - dep atap ótti vıtse-mınıstr Ahmetjan Pirimqulov.
Sonymen qatar, mınıstrlik osy demalys kúnderinen bastap ulttyq parkterde jáne demalys aımaqtarynda qoǵamdyq reıd júrgize bastady.
Bul jergilikti jerlerde qorshaǵan ortany qorǵaý salasyndaǵy jaǵdaıdy baqylaýǵa jáne jedel sharalar qabyldaýǵa, sonyń ishinde zańbuzýshylarǵa aıyppul salýǵa múmkindik beredi.
Alaıda jaǵdaıdy ózgertý úshin jalpy halyqtyń ekologııalyq mádenıetin kóterý kerek.
