Kóktóbeniń órtengen bókterine Nursultan Nazarbaev qyzǵaldaqtary otyrǵyzyldy
ALMATY. QazAqparat – Almatyda «Jasyl Almaty» kógaldandyrý aktsııasy aıasynda Kóktóbe bókterine Sıvers almasynyń kóshetteri men qyzǵaldaqtyń «Qazaqstan» jáne «Nursultan Nazarbaev» atty túrleri otyrǵyzyldy, dep habarlaıdy QazAqparat.
Atalǵan kógaldandyrý aktsııasyna 500-ge jýyq adam qatysty, onyń 200-ge jýyǵy stýdentter men eriktiler. Barlyǵy Sıvers almasynyń 40 myń kósheti jáne «Qazaqstan» jáne «Nursultan Nazarbaev» surpynan 500 qyzǵaldaq badanasy otyrǵyzyldy.
Almatynyń «jasyl» ekonomıka basqarmasynyń mamandary atap ótkendeı, kóshetter arnaıy alańda bir-birinen 4 metr araqashyqtyqta ornalastyryldy.
Qala ákiminiń orynbasary Erjan Babaqumarov shahar basshysy Baqytjan Saǵyntaevtyń bastamasymen qolǵa alynǵan «Jasyl Almaty» kógaldandyrý aktsııasynyń ereksheligin atap ótti.
«Aktsııa bastalǵaly 10 myńdaǵan túrli aǵash kóshetteri otyrǵyzyldy. Bul degenimiz qala jasyl-jelekke bólenip, ekologııalyq jaǵdaı jaqsaryp, aýa tazara túsedi degen sóz», - dedi E. Babaqumarov.
Aıta ketsek, Kóktóbe taý bókteri tamyz aıynda tutanǵan órtten zardap shekken bolatyn.
Eske sala ketsek, buǵan deıin Baqytjan Saǵyntaevtyń qatysýymen Mohnatka taýynda shrenk shyrshasynyń kóshetteri otyrǵyzyldy.
Sondaı-aq, keshe qalanyń 110 mektebinde 4 myńnan astam ártúrli aǵash túrleri paıda boldy.
«Jasyl Almaty» úshjyldyq kógaldandyrý aktsııasynyń aıasynda jalpy qala boıynsha mıllıonnan astam aǵash otyrǵyzý josparlanýda, onyń ishinde aldymen, Alataý, Naýryzbaı, Jetisý jáne Almaly aýdandarynda.
Mamandardyń esebi boıynsha, qazir Almatyda 2,2 mln túp aǵash bar, onyń 550 myńynyń ajary ketken. Qalany kógaldandyrýǵa ekologııalyq úkimettik emes uıymdar, azamattyq belsendiler, bıznes ókilderi jumyldyrylýda.
