Kóktóbedegi órt sóndirildi
ALMATY. QazAqparat – Almatyda Kóktóbe baýraıynda tutanǵan órt tolyǵymen sóndirildi. QazAqparat bul týraly QR Tótenshe jaǵdaılar mınıstrliginiń baspasóz qyzmetine silteme jasap habarlaıdy.
«6 qyrkúıek kúni saǵat 18:58-de Almaty qalasy TJD órt sóndirýshileri Medeý aýdany, Jánibekov kóshesi, 78-úı mańyndaǵy mekenjaıǵa joǵary dárejedegi shaqyrtý boıynsha jiberildi.
Kelgen boıda aldyn ala boljam boıynsha 3 ga alańda taý baýraıy ýchaskeleriniń janyp jatqany anyqtaldy. Qalanyń ózara is-qımyl qyzmetteriniń kúshteri men quraldary dereý ulǵaıtyldy. Sóndirý kúrdeli relefpen, jeldiń kúsheıýimen jáne kúnniń qarańǵy ýaqytymen qıyndady.
Qabyldanǵan jedel sharalarmen saǵat 20:22-de tolyq oqshaýlaýǵa qol jetkizildi. Saǵat 20:35-de órt tolyqtaı sóndirildi. Qaza bolǵandar men zardap shekkender joq», - delingen habarlamada.
Kóktóbe saıabaǵy men qoǵamdyq tamaqtaný oryndarynan adamdar evakýatsııalandy.
Oqıǵa ornyna 17 órt sóndirý tehnıkasy men sýarý mashınalary, jeke quramnan 130 adam jumyldyryldy.
Aıta keteıik, budan bólek, búgin tańǵy saǵat 11:08 shamasynda Medeý aýdanyndaǵy taý bókterinde qýraǵan shóp jana bastaǵan bolatyn.
Al Keńsaı zıraty aýmaǵynda tutanǵan tabıǵı órtti sóndirýmen qazir 100-den astam adam aınalysyp jatyr.
Vıdeodan alynǵan kadr
