Kóktóbede zańsyz aǵash kesken turǵyn onyń ornyna 1170 tal otyrǵyzýǵa mindetti
ALMATY. QazAqparat – Almaty ákimi Baqytjan Saǵyntaev Kóktóbe aýmaǵynda zańsyz aǵash kesken jer telimi ıesiniń jaýapkershilikke tartylǵanyn aıtty, dep habarlaıdy QazAqparat tilshisi.
Baqytjan Saǵyntaev «Almaty» telarnasyndaǵy Akimat Live baǵdarlamasynyń tikeleı efırinde qala turǵyndarynyń suraqtaryna jaýap berdi. Onyń aıtýynsha, Medeý aýdanynda zańsyz aǵash kesý faktilerin tekserý nátıjesi belgili boldy.
Birneshe adam ıelik etetin aýmaqta jasyl jelekti zańsyz kesý faktisi anyqtalǵan. Onyń bireýi 117 jasyl jelekti zańsyz keskeni úshin 15 AEK (41 670 teńge) aıyppul tóleıdi. Sonymen qatar, oǵan abattandyrý erejesin buzǵany úshin 50 AEK (138 900 teńge) kóleminde aıyppul salyndy.
Ol kesken aǵashynyń ornyna 1170 kóshet otyrǵyzýǵa mindetti.
«Aǵashty zańsyz kesý jáne jasyl jelekke zııan keltiretin problemany jurtshylyqty keńinen tarta otyryp sheshemiz», - dep atap ótti B. Saǵyntaev.
Sonymen qatar, zańsyz aǵash keskenderdi, olardyń túbine, dińgegine zııan keltirgenderdi anyqtaıtyn «Jasyl baqylaý» jobasy qolǵa alynady jáne zańsyz áreketterge monıtorıng júrgiziledi.
