Kóktóbede kishkentaı qoltyraýyn jetektegen boıjetken kózge tústi
ALMATY. QazAqparat – Áleýmettik jelide Kóktóbede qoltyraýynyń balasymen serýendep júrgen boıjetkeniń vıdeosy tarady. Baýyrmen jorǵalaýshynyń tumsyǵyn skotchpen orap tastapty, dep habarlaıdy QazAqparat tilshisi.
Anyqtalǵandaı, allıgator Kóktóbege sýretke túsý úshin kelgenderge tıesili bolyp shyqty.
«Bul qoltyraýyn Kóktóbede fotosessııa ótkizip jatqan qonaqtardyki. Onyń tumsyǵynyń ne sebepti skotchpen oralǵanyn biz aıta almaımyz. Múmkin bul jalpy qaýipsizdik úshin shyǵar. Biz barlyq sanıtarlyq normalardy qatań saqtaımyz» - deıdi «Kóktóbe parki» JShS ókili Ǵalııa Halılaeva.
Kóktóbede qoltyraýynmen serýendep júrgen boıjetkendi kýágerler vıdeoǵa túsirip alǵan.
Allıgator kaıman tuqymyna jatady. Ony Almaty haıýanattar baǵynan da kórýge bolady.
«Bizdiń Almaty zoobaǵynda kaıman qoltyraýyndary bar. Kaımandar allıgatorlar tuqymdasyna jatady. Olar ártúrli. Olardyń keıbireýi qaýipti. Usaq allıgatorlardyń uzyndyǵy - bir jarym-eki metrge jetedi jáne salmaǵy - orta eseppen 6 keliden 40 kelige deıin», - deıdi Almaty zoobaǵynyń qyzmetkeri Mıhaıl Sorokoýmov.
Vıdeo: Eýrazııa birinshi arnasy