Kóktóbede fotograftan aqsha suraǵan kúzetshiler jazalandy
ALMATY. QazAqparat - «Visit Almaty» týrıstik aqparat ortalyǵy fotograf Maksım Zolotýhınmen Kóktóbede bolǵan jaǵdaıǵa qatysty túsinik berdi, dep habarlaıdy QazAqparat tilishisi.
«VisitAlmaty» ortalyǵy týrısterdi aqparattandyrý jáne týrızmdi damytý úshin qurylǵan. Qalamyzdaǵy kóptegen týrıstik nysandardy saıahatshylarǵa kommertsııalyq maqsatta bolmasa, sýretke tegin túsirýge ruqsat etilgen. Biz qonaq kútý, mádenıet, óner salasyna mamandanǵan kompanııalarǵa kelýshilerdiń fotoǵa túsirýine jaǵdaı jasaý týraly keńester berip turamyz. Al Kóktóbedegi jaǵdaı jekeleı adamdardyń máselesi, biz ol jaǵdaı týraly estidik, kináli adamdar jazaǵa tartyldy. Eger fotoǵa túsirý úshin aqsha talap etken oqıǵanyń kýási bolsańyz, «Visit Almaty» aqparat ortalyǵyna habarlasýdy suraımyz. Biz ol máseleni qarastyratyn bolamyz», - dedi atalǵan aqparat ortalyǵynyń dırektory Kamıla Luqpanova.
Eske sala keteıik, búgin tańerteń almatylyq fotosýretshi Maksım Zolotýhın Facebook-tegi jeke paraqshasynda Kóktóbede basynan ótken jaǵdaıdy jazǵan bolatyn. Onda fotograf Kóktóbe basyna shyǵyp, sýretke túsire almaǵanyn, kúzetshilerdiń odan aqsha suraǵanyn ashyna jazǵan. Kúzetshiler sýretke túsirýge tyıym salynǵanyn aıtyp, budan bylaı sýretke túsirý aqysy 35 000 teńge bolǵanyn jetkizgen. Osy oqıǵany fotosýretshi áleýmettik jelide jarııalaǵannan keıin, Kóktóbe parkiniń ákimshiligi odan keshirim surady.
