«Kóktóbe» telemunarasynyń sáýlettik kelbeti ózgeredi
ALMATY. QazAqparat - Almatydaǵy «Kóktóbe» telemunarasynyń sáýlettik kelbeti taıaý arada ózgeretin bolady. Bul týraly ákimdiktiń baspasóz qyzmetinen habarlady.
Jobalaýshylar telemunarany jańǵyrtý arqyly oǵan álemde joq sıpat berýdi maqsat tutyp otyr. Joba júzege asatyn bolsa telemunara Almatynyń kez-kelgen núktesinen «men mundalap» kóz tartatyn bolady.
Bir eskeretin jaıt, munarany jańartýdy qarjylandyrý jergilikti bıýdjetten emes, jeke ınvestıtsııa tartý arqyly júzege asady.
Mańyzdy nysandy jańǵyrtý barysynda medıaqasbet qoıylyp, alystan basqarylatyn kómeski jaryq beriledi.
«Telemunara kúndiz óziniń burynǵy kelbetin saqtaıdy, onyń qondyrǵylary múldem baıqalmaıdy. Al mereke jáne jeksenbi kúnderi keshki ýaqytta kómeski jaryq pen medıaqasbet iske qosylyp, jaryq kóziniń serpini retinde jumys istep, túrli taqyryptyq aqparattardy kórsetedi, al kúndelikti jumys kúnderi mýltı túrli-tústi mol jaryq beretin bolady. Telemunaradaǵy barlyq jaryq kózderi alystan basqarylatyn bolady», - delingen habarlamada.
Quıylmaly kómeski jaryqtandyrý júıesi men projektorly keshendi jasaýǵa 2 aıǵa jýyq ýaqyt jumsalsa, medıaqasbetti ornatýǵa 4 aı qajet etiledi.
