«Kóktóbe» telemunarasyna jaryq berý kestesi ózgeredi

ALMATY. KAZINFORM – Aldaǵy mereke kúnderine oraı «Kóktóbe» telemunarasyn jaryqtandyrýǵa qosý kestesi ózgeredi.

– 20 jeltoqsannan bastap «Kóktóbe» telemunarasynyń mýltımedııalyq jaryqtandyrýy kún saıyn saǵat 17:00-den 01:00-ge deıin qosylady, al 01:00-den 05:00-ge deıin ǵımarattyń qasbeti negizgi jaryqpen jarqyraıdy. Buǵan deıin telemunaranyń sáýlettik-kórkem jaryqtandyrýy saǵat 20:00-de qosylatyn,– dep habarlady qalalyq ákimdikten.

Qalanyń basty sımvoly ári kórikti orny merekelik jaryq shamdarmen bezendiriledi.

Aıta keteıik, bıiktigi 370 metrden asatyn telemunara 185 TLOS-H projektory ártúrli sáýle taratý buryshtarymen jabdyqtalǵan. Sondaı-aq, qurylymnyń 10 deńgeıin jaryqtandyratyn LED modýlderi bar jaryq syzyqtarynan turatyn medıafasadpen qamtamasyz etilgen.

Osyǵan deıin «Kóktóbe» telemunarasynda jaryqtandyrý tehnologııasy qalaı jumys isteıtini týraly jazǵan edik.

Aıta ketken jón, osyǵan uqsas tehnologııa Nıý-Iorktegi Empire State Building ǵımaratyn jáne Dýbaıdaǵy Býrdj-Halıfa záýlim ǵımaratyn jaryqtandyrady.