«Kóktóbe» telemunarasyna aparatyn qosalqy jol salynýy múmkin
ASTANA. KAZINFORM — «Kóktóbe» telemunarasy qoldanystaǵy seısmıkalyq tózimdilik normatıvterine sáıkes keledi. Bul jaıynda Senat depýtattarynyń saýalyna Premer-mınıstr Oljas Bektenovtiń jaýabynda aıtylǵan.
- «Kóktóbe» telemunarasyna aparatyn jolǵa qatysty aıtar bolsaq, 2024 jyly Almaty qalasynyń ákimdigi uzyndyǵy 0,388 shaqyrym bolatyn ýchaskege ortasha jóndeý jumystaryn júrgizdi. Jol tóseminiń jaı-kúıi qanaǵattanarlyq dep baǵalanǵan. Ýchaske 2027 jyldyń sońyna deıin merdiger uıym – «Almaty Dormehanızatsııa» JShS-niń kepildiginde tur. Telemunaraǵa aparatyn qosalqy (kirme) joldyń qurylys máselesi Almaty qalasynyń ákimdigi tarapynan 2026 jylǵa arnalǵan qurylys jumystaryn josparlaý aıasynda qarastyrylatyn bolady. «Kóktóbe» telemunarasy «Qazteleradıo» aktsıonerlik qoǵamynyń (budan ári – Kásiporyn) balansynda, - dedi Úkimet basshysy.
Onyń atap ótýinshe, qazirgi ýaqytta Kásiporyn tarapynan telemunaranyń tireý konstrýktsııalaryna josparly-aldyn alý jumystary men keshendi zerttep qaraý turaqty negizde júrgiziledi.
- Táýelsiz tehnıkalyq zerttep-qaraýdyń, onyń ishinde 2024 jyly júrgizilgenniń nátıjeleri boıynsha telemunaranyń qoldanystaǵy seısmıkalyq tózimdilik normatıvterine sáıkes keletindigi rastaldy. Konstrýktsııanyń qaýipsizdigine, konstrýktsııalyq ornyqtylyǵyna jáne obektiniń odan ári paıdalanylýyna qatysty qaýip-qaterler anyqtalǵan joq. Tireý konstrýktsııalary tehnıkalyq turǵydan senimdi jáne jumysqa jaramdy kúıde dep tanyldy. Kásiporyn Qazaqstan Respýblıkasynyń ulttyq teleradıo habarlaryn taratý operatory retinde búkil el aýmaǵynda efırlik taratý júıeleriniń irkilissiz jumys isteýin qamtamasyz etedi, asa mańyzdy aqparattyq ınfraqurylym obektileriniń tehnıkalyq senimdiligin qoldap otyrady, - dedi Oljas Bektenov.
Sonymen qatar Úkimet basshysy Jetisý oblysynyń ákimdigi «Úlken Shaǵan» stantsııasyna aparatyn shaqyrym kirme joldyń quqyqtyq mártebesin aıqyndaý jumystaryn júrgizip jatqanyn atap ótedi.
- Tıisti rásimder aıaqtalǵannan keıin qajetti tehnıka tartyp, joldy jóndeý men kútip ustaýǵa qarjy bólý máselesi qaralatyn bolady. Sonymen qatar joldyń tehnıkalyq jaǵdaıyna monıtorıng júrgizý, jer ýchaskelerin zańdastyrý jáne joldy Jetisý oblysynyń Kóksý aýdany ákimdiginiń balansyna qabyldaý josparlanýda. Ortasha jóndeýge arnalǵan jobalyqsmetalyq qujattamany ázirleý 2026 jyldyń IV toqsanyna josparlanǵan, - dedi ol.
7 shildede Almatynyń eń kórnekti oryndarynyń biri - «Kóktóbe» telemunarasy Ulttyq dombyra kúnine oraı erekshe jaryqpen aıshyqtalyp, merekelik keıipke engenin jazǵan edik.