«Kóktóbe» saıabaǵynda 3 400-den astam aǵash otyrǵyzyldy (FOTO)
ALMATY. QazAqparat - Almatydaǵy «Kóktóbe» saıabaǵynda aǵash jáne tal-shilikter otyrǵyzý jumystary qarqyndy túrde júrgizilip jatyr. Bul týraly búgin atalmysh saıabaqtyń basshylyǵy habarlady. Kúni búginge deıin barlyǵy 3 472 kóshet otyrǵyzylǵan.
Sonymen qatar, joǵarydaǵy stansanyń irgesine 960 túp raýshan gúli, al saıabaqtyń joǵarǵy alańqaıynda 18 úıeńki aǵashynyń kósheti egildi. Kóktóbeniń ońtústik-batys bókterine alma, órik, almurt, shabdaly sekildi jemis aǵashtarynyń da kóshetteri otyrǵyzyldy.
Kóktóbeniń batys jáne soltústik-shyǵys jaǵynda da kógaldandyrý jumystary júrgizilip jatyr. Munda japyraqty jáne qylqan japyraqty aǵashtar otyrǵyzylyp, tamshylap sýarý júıesi ornatyldy. Naýryz aıynda munda 7 túp «Sakýra» shıesi men 100 túp bórtegúl kósheti egilgen bolatyn.
Sondaı-aq, bolashaqta saıabaq aýmaǵynda aport almasy jaıqalyp ósip turatyn bolady. «Integratsııa» halyqaralyq qorynyń tóraǵasy Sergeı Tereşenko saıabaqqa aport almasynyń 200 kóshetin syıǵa tartty.
«Qazaq qurylys jáne sáýlet ǵylymı-zertteý jáne jobalaý ınstıtýty» aktsıonerlik qoǵamy («QazQSǴZI» AQ) usynysymen jer kóshkinin boldyrmas úshin 2004 jyly Kóktóbeniń shyǵys jáne soltústik jaǵynda tereńdigi 9 metrden 24 metrge deıin bolatyn 395 uńǵyma qazylyp, betondalǵan edi. Biraq, keıin bulardyń jetkiliksiz ekendigi belgili boldy. Sóıtip, 2014-2015 jyldary qosymsha uzyndyǵy 22,5 metr bolatyn taǵy 365 baǵana qaǵyldy. Sondaı-aq, Kóktóbeniń betki qabatyn sýdyń áserinen qorǵaý maqsatynda gıdrooqshaýlaý sharasy júrgizildi.
