Kókten túsken tosynsyı: Qaraǵandyda drondar baýyrsaq taratty
QARAǴANDY. KAZINFORM - Qaraǵandyda Naýryznama aıasyndaǵy merekelik dýman bıyl erekshe sıpat alyp, tyń formatta uıymdastyryldy. Qalanyń Ortalyq saıabaǵynda drondar turǵyndarǵa baýyrsaq taratyp, kópshilikti tańqaldyrdy.
Uıymdastyrýshylardyń málimetinshe, bıylǵy Naýryz zamanaýı tehnologııalarmen ushtasyp, Digital Naýryz – 2026 ataýymen ótip jatyr. Bul bastama ulttyq dástúr men ınnovatsııany úılestirip, merekeniń mazmunyn baıytyp, kórermenge áserli ári este qalarlyq format usynýǵa múmkindik berdi.
- Mundaıdy múlde kútpedim. Bir sátte dron jaqyndap kelip, baýyrsaq tarata bastady. Bul buryn-sońdy bolmaǵan kórinis. Bir jaǵynan qyzyq, ekinshi jaǵynan merekelik kóńil kúı syılady. Yrys-bereke mol bolsyn!, – deıdi qala turǵyndarynyń biri.
Qala qonaqtary men turǵyndary merekedegi kórinisterge rıza bolysty.
- Osyndaı zamanaýı ári mazmundy is-sharalar kóbeıe tússe ıgi. Búgin Ortalyq saıabaqta shyn máninde jarqyn mereke ótti — bul kóńil kúı alǵashqy mınýttardan-aq seziledi, – dep atap ótti kelýshilerdiń biri.
Naýryznama baǵdarlamasy tek qoǵamdyq keńistiktermen shektelmeı, bilim berý uıymdaryn da qamtydy. Óńir mektepterinde ulttyq qundylyqtardy dáripteýge baǵyttalǵan taqyryptyq is-sharalar ótip jatyr. Solardyń biri — Qaraǵandy qalasyndaǵy mektepterdiń birinde uıymdastyrylǵan «Baýyrsaq-party». Bul sharada oqýshylar ata-analarymen birge dástúrli taǵamnyń 30-dan astam túrin daıyndady.
- Biz shelpek, baýyrsaq, shı-baýyrsaq, órme baýyrsaq jáne shaıǵa arnalǵan baýyrsaq ázirledik. Barlyǵyn óz qolymyzben, analarymyzben birge pisirdik, – deıdi mektep oqýshysy Adına Beısembek.
Jalpy, Qaraǵandy oblysynda Naýryznama kúnderi myńnan astam is-shara ótkizý josparlanǵan. Turǵyndar men qala qonaqtaryna arnalǵan kontsertter, kórmeler jáne ınteraktıvti sheberlik saǵattary qarastyrylǵan. Basty maqsat — ulttyq dástúrdiń baı murasyn zamanaýı formatta jańǵyrtyp, kópshilikke merekelik jylýlyq pen erekshe áser syılaý.
Osyǵan deıin 62 jyl toılanbaǵan Naýryz qazaq eline qalaı oralǵany jaıly jazǵan bolatynbyz.