Kóktemgi tasqyn: ShQO-da 1400 úıdiń sý astynda qalý sebebi ataldy

SEMEI. QazAqparat - Búgin Shyǵys Qazaqstan oblysynda kóktemgi sý tasqynyna daıyndyq kezinde «Azamattyq qorǵanys týraly» QR Zańynyń talaptaryn saqtaý máselesi qaraldy. Prokýratýra qyzmetkerleri sý tasqyny ahýalyn, taldaý qorytyndylary men tótenshe jaǵdaıdyń aldyn alý jáne joıý boıynsha qabyldanǵan sharalar týraly baıandady.  Bul týraly QazAqparat tilshisi Shyǵys Qazaqstan oblysynyń prokýratýrasyna silteme  jasap habarlaıdy.

Eske salaıyq, osy jyldyń kókteminde Glýbokoe, Shemonaıha, Zyrıan aýdandarynda, sondaı-aq Semeı jáne Óskemen qalalarynda 1400 turǵyn úıdi sý basyp, 3 myńnan astam adam qaýipsiz jerge kóshirilgen bolatyn. Arnaıy tekserý jumystaryn júrgizgen prokýrorlar tótenshe jaǵdaıǵa yqpal etken birqatar sebepterdi anyqtady.

«Eń aldymen, qalyptasqan qolaısyz aýa raıyn eseptemegende, jaýapty tulǵalardyń óz laýazymdyq mindetterin laıyqty oryndamaýy jáne nemquraılyq tanytýy basty sebep boldy.  Jerdiń ústińgi qabatyndaǵy erigen sýdy qorǵanys qurý arqyly aǵyzý, ózen arnasyn, sý aǵyzatyn qubyrlardy, aryqtardy, sý sińiretin júıelerdi  tazalaý jumystary júrgizilmeı, arnaıy tehnıkalar aldyn ala daıyndalmaǵan. Erigen qar men jańbyr sýyn aǵyzý júıeleri múlde joq nemese buzylǵan. Eldi mekenderdiń mańynda erigen qardyń sýyn aǵyzý jumystary  júrgizilmegen», - delingen oblys prokýratýrasy taratqan habarlamada. 

Atap ótilgendeı, Ertis basseıni ınspektsııasy Shúlbi gıdro-elektr stansysy negizsiz 1800 tekshe metr sý aǵyzyp jibergen. Saldarynan  290 turǵyn úıdi jáne 437 saıajaıdy sý basyp, «Qazaqstan sý joldary» RMK-niń múlki zaqymdandy. Qazir osy fakti boıynsha sotqa deıingi tergeý júrgizilýde.

«Sondaı-aq otyrys barysynda sý tasqynyn aldyn alý sharalary jáne azamattyq qorǵanys organdarynyń materıaldyq-tehnıkalyq jabdyqtalýy da nashar ekeni aıtyldy.  Mysaly, sý tasqyny kezinde 85 motopompa barlyq aımaqtarǵa jetpegen,  ortasha alǵanda 4 qala jáne 15 aýdanǵa sýdyń orasan kólemin aǵyzatyn 2-3 jabdyq  qana bólingen. Sý tasqynynyń taǵy da bir faktory - úı qurylysy kezinde jergilikti gıdrologııa jaǵdaıynyń erekshelikterin, sý qorǵaý beldikteri men aýmaqtarynyń eskerilmeýi, sondaı-aq halyqtyń óz úıleriniń jáne aýlasyndaǵy ýchaskelerdiń jaǵdaıyna jaýapsyzdyqpen qaraýy», - dep atap ótti prokýratýradan.

Jıyn sońynda  jaýapty organdarǵa tabıǵı sıpattaǵy barlyq apattardyń aldyn alý jáne olardy boldyrmaý boıynsha áreketterdiń tártibin retteıtin tıisti quqyqtyq aktilerdi ázirleý sharalaryn qabyldaý usynyldy.