Kóktemgi tasqyn saldarynan tórt oblysta kólik qozǵalysy shekteldi
ASTANA. QazAqparat - Qazaqstannyń tórt oblysynda kóktemgi sý tasqyny saldarynan kólik qozǵalysy toqtatyldy, dep habarlaıdy «QazAqparat» HAA «Qazaqavtojol» RMK-ǵa silteme jasap.
Vedomstvonyń aqparaty boıynsha, Qaraǵandy oblysynda sý tasqynyna baılanysty «Aqshataý-Aqadyr» (90-167 km) avtojolynda barlyq kólik túrleri úshin qozǵalysqa shekteý qoıyldy. Aınalma jol «Qaraǵandy-Aqsý-Aıýly-Aǵadyr» baǵyty arqyly júzege asady.
ShQO-da sýdyń tasýyna baılanysty barlyq avtokólik túrlerine «Semeı-Qaınar» tasjolynyń 8-166 shaqyrym aralyǵymen júrýine tyıym salyndy. Bul joldyń 27 shaqyrymyn sý shaıyp ketken. Ýchaskeni «Semeı-Qaraýyl» tasjolymen aınalyp ótýge bolady.
Pavlodar oblysyndaǵy «Lenınsk-Aqsý-Kóktóbe-Úlken Aqjar» tasjolynyń (186-220 km) Maı kentinen Kýrchatov qalasyna deıingi ýchaskesinde tasqyndy sýlar kóliktiń barlyq túrleri úshin tosqaýyl boldy.
Dál osy jaǵdaı OQO-nyń «Samara-Shymkent» (2217-2235 km) jolynda da oryn aldy. Munda Arys ózenindegi kópirdiń jaǵalyq bekinisterin sý buzyp ketkendikten, barlyq avtokólik qozǵalysyna shekteý qoıyldy. Aınalma jol - Temirlan aýyly arqyly.
Qazaqavtojoldan atap ótkendeı, barlyq atalǵan aýmaqtarda eskertý belgileri bar sıgnaldyq baǵandar ornatylǵan. Táýlik boıy kezekshilik atqarylýda.
