Kóktemgi sý tasqynynan zardap shekkenderge 30 myń teńgeden beriledi
NUR-SULTAN. QazAqparat - Bolat Ótemuratovtyń qory kóktemgi sý tasqynynan zardap shekken qazaqstandyqtarǵa aqshalaı kómek beredi, dep habarlaıdy QazAqparat.
Bul týraly qaıyrymdylyq qorynyń dırektory Marat Aıtmaǵambetov Ortalyq kommýnıkatsııalar qyzmetindegi brıfıngte aıtyp berdi.
«Kómek kartasy» jobasy 2018 jyly bastalǵan. Bizdiń Qor kóktemgi sý tasqynynan, tehnogendi apattardan zardap shekken óńir turǵyndaryna qarajat bóledi. Munda Qyzyl jarty aı uıymy kómekke muqtajdardy anyqtaıdy jáne Fortebank óz kartalary arqyly aqsha aýdarymyn qamtamasyz etedi. Árbir zardap shekken turǵynǵa 30 myń teńgeden beriledi. Árıne, eń aldymen baspanasy qıraǵandar, jalǵyzbasty zeınetkerler, múgedekter, jalǵyzbasty analar, kópbalaly, az qamtylǵan januıalar nazarǵa alynady», - dedi M. Aıtmaǵambetov.
Onyń aıtýynsha, tótenshe jaǵdaıda gýmanıtarlyq kómek kórsetetin uıymdar jeterlik. Olar azyq-túlikpen jáne qajetti kıim-keshektermen qamtamasyz etedi.
«Biz óz kezegimizde zardap shekkenderge aqshalaı kómek kórsetýdi uıǵardyq. Bul qarjyǵa qajetti zattar, dári-dármek, qurylys materıaldaryn alýǵa bolady. Gýmanıtarlyq kómekti, júkti tasymaldaýdyń óz shyǵyndary bar. Al tikeleı qarjylaı kómek aýdarý óte tıimdi. Qarajatty Qazaqstannyń kez kelgen núktesine jyldam jiberýge bolady», - dedi qor dırektory.
2018 jyly «Kómek kartasy» jobasy arqyly Shyǵys Qazaqstan obylsyndaǵy 863 otbasy 82 mln teńge kómek alǵan. 2019 jyly 114 mln teńge aqshalaı kómek Qaraǵandy, Aqmola, Soltústik Qazaqstan, Almaty oblystary men Arys qalasyndaǵy 764 otbasyna kórsetilgen.
