Kóktemgi sý tasqyny: ShQO qutqarýshylary monıtorıng jumystaryn jalǵastyrýda
ÓSKEMEN. QazAqparat – Shyǵys Qazaqstan oblysynda qutqarýshylar sý tasqynynyń aldyn alý úshin qar jamylǵysyndaǵy ylǵal qoryn ólsheýde, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, qutqarýshylar men «Qazgıdromet» RMK ShQOF mamandary birlesip, qar jamylǵysyndaǵy ylǵal qoryna monıtorıng júrgizýde. Bul maqsatta olar jol talǵamaıtyn tehnıkamen Ertis ózeniniń sol jaǵalaýyndaǵy Óskemenge, Tavrııa, Prıvolnoe jáne Kishi Qarasý aýyldaryna barǵan. Qardyń tyǵyzdyǵyn aıqyndaıtyn «VS-43» qurylǵysynyń kómegimen ólsheý jumystary júrgizildi.
«Óńir boıynsha tekserilgen aýmaqtardaǵy qar jamylǵysynyń deńgeıi 50%-dy qurap otyr. Sondaı-aq ólsheý jumystary Vostochnoe aýylynda júrgizildi. Munda qar jamylǵysy - 90%, ortasha bıiktigi - 35 sm qurasa, qardaǵy sý qory - 126 mm-ge jetken. Prıvolnoe aýylynda qar jamylǵysy - 70%, bıiktigi - 83 sm, sý qory - 241 mm. Shaǵyn jyralarda qar jınalýy baıqalady», - delingen habarlamada.
Óńirde aýa temperatýrasy kúrt jylynyp, jaýyn-shashyn kóp bolǵan jaǵdaıda sý tasqyny qaýpi saqtalady.
