Kóktemgi sý tasqyny: ShQO-da 2,5 myńǵa jýyq tehnıka daıyn tur
Shyǵys Qazaqstan oblysynda sý tasqyny kezeńi jaqyndap keledi. Osy rette qutqarýshylar qyzý daıyndyq ústinde.
«Búgingi tańda óńirde jerdiń tońy bir jarym metrge jýyqtaıdy. Jazyq jerlerdegi qar jamylǵysynyń bıiktigi 90 sm, taýly aımaqtarda 1,5 metrden 2 metrge deıin jetedi. 53 bekette sý obektilerine gıdrometeorologııalyq monıtorıng jasalýda. Qazirgi ýaqytta jaǵdaı turaqty. Muz qalyńdyǵy – 94 sm», - delingen ShQO TJD baspasóz qyzmeti taratqan málimette.
Óńir boıynsha 94 eldi mekendi sý basý qaýpi bar. Ondaǵy 7191 turǵyn úıde 22 613 adam turady. Ásirese Óskemen qalasy, Altaı, Katonqaraǵaı, Tarbaǵataı, Glýbokoe, Shemonaıha, Kókpekti jáne Borodýlıha aýdandarynda tasqyn qaýpi joǵary.
«Barlyq qyzmetterdiń jumysyn kúsheıtý maqsatynda aımaq boıynsha joǵary daıyndyq rejımi engizildi. Sý tasqynyna qarsy is-sharalar jospary bekitilip, iske asyrylýda. Arnaıy qurylǵan jumys toptary jergilikti atqarýshy organdardyń tasqynǵa daıyndyǵyn tekserdi. Barlyq qaýipti ýchaskeler baqylaýda», - delingen habarlamada.
Aıta keteıik, kóktemgi sý tasqyny kezeńinde Shyǵys Qazaqstanda 3 myńnan astam adam, 2412 birlik tehnıka, 370 motopompa jáne 108 evakýatsııalyq pýnkt ázirgengen. Qalalar men aýdandardyń ákimdikteri 97 myń dana ydys-qap, 15 myń tonna ınertti materıal, 419 tonna janar-jaǵar maı daıyndady.
