Kóktemgi sý tasqyny: ShQO-da 108 evakýatsııalyq pýnkt ázirlendi
ÓSKEMEN. QazAqparat - Shyǵys Qazaqstan oblysynyń ákimi Danıal Ahmetov kóktemgi sý tasqyny kezeńiniń búgingi ahýaly boıynsha jınalys ótkizdi, dep habarlaıdy QazAqparat tilshisi.
Aýa temperatýrasynyń kóterilýine jáne sý aıdyndarynda muzdyń erýine baılanysty óńirde sý tasqynyna qarsy qarqyndy sharalar jalǵasýda. Búgingi tańda 564 myń tekshe metr qar shyǵarylǵan. Jedel shtab ókilderi 3779 avtokólik jolyndaǵy, 160 temirjoldaǵy sý ótkizý qurylystaryn, 575 kópirdi, 689 aryq pen kanaldy tazartty. 2412 tehnıka, 377 motopompa jáne 108 evakopýnkt daıyndalǵan.
«Sý basý qaýpi bar 19 eldi meken úshin ýaqytsha ornalastyrý pýnktteri qarastyrylǵan. Sondaı-aq Altaı aýdanynda 32, Katonqaraǵaı aýdanynda 21, Besqaraǵaı aýdanynda 13, Glýbokoe aýdanynda 30 motopompa ázirlendi. Qalalar men aýdandardyń ákimdikteri 109,6 myń dana ydys-qap, 15,5 myń tonna ınertti materıal, 532 tonna JJM daıyndady», – deıdi ShQO Tótenshe jaǵdaılar departamentiniń bastyǵy Erlan Nurpeıisov.
Onyń aıtýynsha, 31 naýryzda jer tońy Kúrshim aýdanynda 150 sm, Katonqaraǵaı aýdanynda 147 sm, Besqaraǵaı aýdanynda 124 sm, Zaısan aýdanynda 120 sm, Borodýlıha aýdanynda 110 sm jáne Altaı aýdanynda 119 sm deńgeıde.
Óz kezeginde aımaq basshysy Danıal Ahmetov aýdan ákimderine sý tasqyny qaýpi bar barlyq eldi mekenderdi qaıta aralap, jaǵdaıdy baıandaýdy tapsyrdy.
«Jaǵdaı kúrdeli. Kúsheıtilgen jumys júrgizilip jatqanyn kórip otyrmyn. Orynbasarym Baqytjan Baıahmetovke jáne ShQO Tótenshe jaǵdaılar departamentiniń bastyǵy Erlan Nurpeıisovke qajetti tehnıkalyq resýrstardy Katonqaraǵaı, Besqaraǵaı, Glýbokoe, Kókpekti jáne Altaı aýdandaryna jiberý úshin TJD jergilikti atqarýshy organdarynyń kúshter rezervin qalyptastyrýdy tapsyramyn. Eger qajettilik týyndaǵan jaǵdaıda, jarty saǵat ishinde sý basqan aýmaqqa qaraı jiberý kerek», - dep qorytyndylady ShQO ákimi.
