Kóktemgi sý tasqyny: Aqmola oblysynda 125 eldi meken qaýipti aýmaqta ornalasqan
KÓKShETAÝ. QazAqparat - Aqmola oblysynda kóktemgi yqtımal sý tasqynynyń aldyn alý jumystary júrgizilýde. Búgingi tańda aımaqtyń eldi mekenderinen 342 myń tekshe metrden astam qar shyǵaryldy. Bul týraly brıfıngte TJD bastyǵynyń orynbasary Qanat Dospaev málim etti, dep habarlaıdy QazAqparat tilshisi.
Departament bastyǵy orynbasarynyń aıtýynsha, oblystyń 17 aýdanyndaǵy 125 eldi meken kóktemgi yqtımal sý tasqynyna qaýipti aýmaqta ornalasqan. Bul eldi mekenderde 13 myńnan astam adam turady. Sonymen birge, sý basý qaýpi bar aımaqta 74 avtomobıl jáne 4 temir jol ýchaskeleri bar.
«Bıylǵy jyldyń 2-shi aqpanyndaǵy jaǵdaı boıynsha oblys boıynsha qardyń ortasha bıiktigi ótken jyldyń sáıkes kezeńimen salystyrǵanda 9 paıyzǵa artyq, qardaǵy sý qory 19 paıyzǵa kóp. Ózen basseınderindegi ylǵal qorynyń kólemi - Esil, Moıyldy (Astana sý qoımasyna quıylatyn sý), Jabaı, Kolýton, Chaglınka (Chaglınka sý qoımasyna quıylatyn sý) jáne Sileti (Seleti sý qoımasyna quıylatyn sý) kóp jyldyq ortasha mólsherden 2-den 30 paıyzǵa tómen. Óńirde sý tasqynyna daıyndyq ótken jyldyń jaz mezgilinde bastaldy. Injenerlik qorǵaý boıynsha josparǵa sáıkes sý basý qaýpi bar 53 eldi mekende 35 km sý burý arnalaryn jaılastyrý, 22 km ózen arnasyn tazartý, 47 sý ótkizý qurylysyn ornatý jáne jóndeý jumystary qolǵa alyndy. Budan bólek, qar shyǵarý jáne sý aǵatyn kanaldyq júıelerdi retke keltirý, ınertti materıaldar qoryn jasaý, sý ótkizý qubyryn tazartý boıynsha jumystar júrgizilýde», - dedi Qanat Dospaev.
Osy rette, óńirde yqtımal tótenshe jaǵdaıdy aldyn alý úshin oblysta 1,6 mıllıard teńgeden astam qarajat qarastyrylǵan. Oblystyń eldi mekenderinen 342 myń tekshe metrden astam qar shyǵaryldy.
«Aýdandar men qalalar boıynsha 227 tonna janar – jaǵar maı (2021 – 273 tonna), 12,7 myń tonna ınertti materıal (2021 – 6,8 myń tonna), 70,8 myń qap (2021-66,7 myń dana) daıyndaldy. Sonymen birge, 2153 adam, 983 birlik tehnıka, 151 motopompa, 35 júzý quraldary daıarlandy. Sý tasqyny bola qalǵan kezde tótenshe jaǵdaılar departamentiniń jeke quramynan 445 adam, 84 tehnıka, 12 júzý quraldary jáne 97 motopompa jumyldyrylady. Sý tasqyny jaǵdaıy kúrdelengen jaǵdaıda tótenshe jaǵdaılar departamentiniń qosymsha kúshteri men quraldaryn kóshirý josparlanýda. Sondaı-aq basqa oblystardan kómekke adamdar tartý josparlanǵan», - dep tolyqtyrdy Qanat Dospaev.
