Kóktemgi egistik jumystary kezinde dızeldi otynnyń baǵasy 68-69 teńgeden aspaıtyn bolady - AShM
ANA. 17 naýryz. QazAqparat /Arman Asqarov/ - Bıylǵy egistik jumystary kezinde aýyl sharýashylyǵy salasyndaǵy ónim óndirýshilerge jetkiziletin dızeldi otynnyń baǵasy 68-69 teńgeden aspaıtyn bolady.
Bul týraly búgin QR Aýyl sharýashylyǵy mınıstrliginiń alqa májilisinde kóktemgi egistikke daıyndyq jumystary boıynsha esep bergen Jer sharýashylyǵy jáne fıtosanıtarlyq qaýipsizdik departamentiniń dırektory Anna Býts málim etti.
Onyń sózine qaraǵanda, aýyl sharýashylyq salasy aldaǵy egistik jumystaryna tehnıkalyq jaǵynan 90 paıyzǵa daıyn. «Osy saladaǵy ónim óndirýshilerdi naýryz, sáýir jáne mamyr aılarynda arzandatylǵan dızelti otynmen qamtamasyz etý máselesi sheshildi. Barlyq tasymaldaý shyǵyndaryn eseptegende, aýyl sharýashylyǵy salasyndaǵy ónim óndirýshilerge jetkiziletin dızeldi otynnyń bir lıtri 68-69 teńgeden aspaıtyn bolady», - deıdi A.Býts.
Departament dırektory atap kórsetkendeı, búginde arzandatylǵan dızeldi otynmen qamtamasyz etý jumysy baıaý júrgizilýde. Sol sebepti ákimdikter naqty jumys kestelerin quryp, otandyq ónim óndirýshilerdi 69 teńgeden aspaıtyn dızeldi otynmen qamtamasyz etýdiń naqty is-sharalaryn qolǵa alýy tıis.
Jalpy, qazirgi kezde egistik alqaptaryna qajetti tuqym túrleriniń 98 paıyzy bar. Tapshylyq tek Aqtóbe jáne Batys Qazaqstan oblystarynda ǵana baıqalady.
