Kóktemgi egiske arzan baǵamen jetkiziletin 354 myń tonna jaǵarmaıdyń 290 tonnasynyń quny tólendi

Bul týraly búgin selektorlyq rejımdegi Úkimet otyrysynan keıingi brıfıngte Aýyl sharýashylyǵy mınıstri Asyljan Mamytbekov aıtty.

Vedomstvo basshysynyń sózine qaraǵanda, búginde kóktemgi egis naýqany jumystary aıasynda tuqym jáne basqa da qajettilikter boıynsha týyndap otyrǵan máseleler joq. Osy oraıda ol elimizdiń ońtústik óńirlerinde egin egý sharalary júrip jatqandyǵyn, al soltústik aýmaqtardaǵy jumystar endi bastalatynyn jetkizdi.

Mınıstrdiń aıtýynsha, qazirgi kezde atalǵan janar-jaǵarmaıdy jetkizý úrdisi bekitilgen tártip boıynsha atqarylýda. Atap aıtqanda, buǵan deıin keıbir aýyl sharýashylyǵy taýaryn óndirýshilerde jeńildikti nesıeleý úshin aılanymdaǵy qarjysy men banktik kepildikti alýdaǵy múmkindikteri bolǵan joq edi. Osy oraıda A. Mamytbekov ótken aptalarda banktik kepildemeni alýǵa qaýqary joq aýyl sharýashylyǵy taýarlaryn óndirýshilerdi Áleýmettik kásipkerlik korporatsııanyń kepildigimen qarjylandyrý sheshimi jasalǵanyn atap ótti. Bul sharalardyń nátıjesinde tólemder operatorlarǵa ýaqytyly jetkizilgendikten jaǵarmaıdy jetkizý kólemi aıtarlyqtaı arta tústi. Osyǵan sáıkes kóktemgi egiske arnalǵan jaǵarmaıdy jóneltýdi munaı óńdeý zaýyttary arttyrdy.