Kóktemgi egis jumystaryna 400 myń tonna dızel bólindi
Bul jóninde QR Aýyl sharýashylyǵy birinshi vıtse-mınıstri Aıdarbek Saparov Úkimet otyrysynda málim etti.
«Bıyl egis jumystaryn júrgizýge 400 myń tonna kóleminde dızel otyny bólindi. Bul ótken jylmen salystyrǵanda 20 myń tonnaǵa artyq.
Qazirgi ýaqytta oblys ákimdikteri keıinnen aýyl sharýashylyǵy taýaryn ónimderin ótkize otyryp, munaı óńdeý zaýytynan óńirlerge dızel otynyn satyp alýdy jáne jetkizýdi qamtamasyz etetin operatorlardy aıqyndaý jónindegi is-sharalardy aıaqtaýda. Ońtústik óńirlerde júk tıeý bastaldy», - dedi mınıstrdiń orynbasary.
Onyń deregi boıynsha, saraptamaǵa 1,5 mln tonna jazdyq daqyldar tuqymy kelip túsken.
«Onyń 1,3 mln tonnasy nemese 90% tekserildi. Tekserilgen tuqym kóleminiń 99%-y kondıtsııaly dep tanylsa, 89,3% egis standartynyń 1 jáne 2-klasyna sáıkes keledi.
Sońǵy bes jylda tuqym óndirýshilerdi egis tehnıkasymen qamtamasyz etý 70%-dan 89,4%-ǵa deıin, egin jınaý 80%-dan 92%-ǵa deıin, tuqym tazalaý 63%-dan 81,4%-ǵa deıin óskenin atap ótken jón.
Bul rette tuqym óndirýshilerdiń materıaldyq-tehnıkalyq bazasyn jańartýdyń ósý qarqyny sońǵy jyldarǵa keledi. Osylaısha, respýblıkanyń barlyq derlik aımaqtarynda zamanaýı tuqym tazartý keshenderimen jabdyqtalǵan aldyńǵy qatarly tuqym sharýashylyqtary bar.
Ótken jyldyń aýa-raıy jaǵdaıy tuqymnyń sany men sapasyna áser etti. Sondyqtan bul máseleni ákimdikter erekshe baqylaýda ustaýy qajet», - dedi Aıdarbek Saparov.