Kóktemgi egis jumystaryn júrgizýge qosymsha 100 mlrd teńge bólindi

NUR-SULTAN. QazAqparat – Prezıdenttiń tapsyrmasymen «Qarapaıym zattar ekonomıkasy» baǵdarlamasy aıasynda kóktemgi egis jumystaryn júrgizýge qosymsha 100 mlrd teńge bólindi, dep habarlaıdy QazAqparat tilshisi.

«Qazirgi ýaqytta egis naýqany ońtústik óńirlerde júrgizilip jatyr. Osylaısha Jambyl oblysynda 249,5 myń ga nemese jazdyq egis alańynyń 67 paıyzynda, Túrkistan oblysynda 167,5 myń ga aýmaqqa (25,5%), Almaty oblysynda 97,1 myń ga (15,6%), Qyzylorda oblysynda 23,9 myń ga (17,6%) alqapta egis jumystary júrgizildi», - dedi Aýyl sharýashylyǵy vıtse-mınıstri Aıdarbek Saparov onlaın rejımde OKQ-da ótken baspasóz máslıhatynda.

Vıtse-mınıstr Memleket basshysynyń 2020 jylǵy 31 naýryzdaǵy tapsyrmasyn oryndaý aıasynda aýyl sharýashylyǵy taýaryn óndirýshiler úshin respýblıka boıynsha dızeldik otynnyń lıtriniń baǵasy 165 teńge bolatynyn jetkizdi.

«Sonymen qatar, Prezıdenttiń tapsyrmasymen «Qarapaıym zattar ekonomıkasy» baǵdarlamasy aıasynda kóktemgi egis jumystaryn júrgizýge qosymsha 100 mlrd teńge bólindi. Sýbsıdııalaýdy esepke ala otyryp, sońǵy syıaqy mólsherlemesi qaryz alýshylar úshin jyldyq 6 paıyzdy quraıdy. Bul sharýalardy aınalym qarajatymen, tuqym, tyńaıtqyshtar, ósimdik qorǵaý quraldarymen, qosalqy bólshektermen qamtamasyz etýge múmkindik beredi», - dedi ol.