Kóktemgi egis jáne egin jınaý jumystaryn qarjylandyrý 2 esege ulǵaıdy
Jıynda Aýyl sharýashylyǵy mınıstri Erbol Qarashókeev sóz sóılep, ósimdik ósirýshilerdi memlekettik qoldaý sharalary men salanyń mańyzdy baǵdarlamalaryna jeke toqtaldy.
«Kóktemgi egis jáne egin jınaý jumystaryn qarjylandyrý kólemi 2 esege ulǵaıyp, 140 mlrd teńgege jetti. Bul rette qosymsha 70 mlrd boıynsha kredıt berý normatıvi ulǵaıtyldy, bul týraly fermerlerdiń ózderi suraǵan bolatyn. Sondaı-aq «Azyq-túlik korporatsııasy» forvardtyq satyp alý tájirıbesi jalǵasyp, satyp alynatyn daqyldardyń tizbesi 10 ataýǵa deıin keńeıtildi. Tizimge zyǵyr, raps, qaraqumyq jáne júgeri kiredi», - dedi mınıstr.
Erbol Qarashókev sharýalardy qoldaýdyń basqa da sharalaryn atap ótti. Memleket basshysynyń tapsyrmasy boıynsha, jappaı egin jınaý jumystarynyń bastalýyna qaraı fermerler nesıeleýdiń tıimdi sharttarymen jeńildikti lızıng baǵdarlamasy aıasynda aýyl sharýashylyǵy tehnıkasyn aldy. Osy sharalardyń barlyǵy jaqsy ónim jınaýǵa múmkindik berdi.
«Eger buryn boljanǵan ónim 18,4 mln tonna astyqty qurasa, búgingi kúni ortasha ónimdiligi 13,5 ts / ga bolǵanda 21,6 mln tonna astyq bastyryldy. Sonymen qatar, bıdaı boıynsha jalpy alym 13,4 mln tonna deńgeıinde boljanǵan bolatyn, biraq búginde bastapqy salmaqta 16,2 mln tonna jınaldy», - dep tolyqtyrdy Erbol Qarashókeev.
Mınıstr sondaı-aq Prezıdent tapsyrmasy boıynsha tuqym sharýashylyǵyn damytý úshin otandyq selektsııany tuqymmen qamtamasyz etý boıynsha jeke keshendi jospar ázirlenip jatqanyn atap ótti. Al ımportqa táýeldilikti tómendetý maqsatynda tuqym sharýashylyǵynyń ǵylymı-óndiristik ortalyǵy qurylady, onda biryńǵaı tizbekte «selektsııa, tuqym sharýashylyǵy jáne óndiris» biriktiriledi.
«Aldaǵy jyldan bastap damyǵan elderdiń tájirıbesi boıynsha joǵary reprodýktsııaly tuqymdardyń orıgınatorlardan taýarlyq sharýashylyqtarǵa deıin ilgerileýin tsıfrlyq formatta qadaǵalaýǵa múmkindik beretin jańa aqparattyq júıe engiziletin bolady, bul olardyń paıdalanylýyna qatań baqylaý ornatýǵa múmkindik beredi», - dep qosty AShM basshysy.
Jıyn sońynda ósimdik sharýashylyǵynyń ozattary vedomstvolyq nagradalarmen marapattaldy.
Foto: gov.kz