Kóktemgi egis ýaqytynda aýyl sharýashylyǵy taýarlaryn óndirýshiler úshin jetkiziletin dızeldik otyn baǵasy 62 teńgeden aspaýy tıis - Ó. Shókeev
ASTANA. Naýryzdyń 9-y. QazAqparat /Qanat Mámetqazyuly/ -Kóktemgi egis ýaqytynda aýyl sharýashylyǵy taýarlaryn óndirýshiler úshin jetkiziletin dızeldik otyn baǵasy 62 teńgeden aspaýy tıis, dedi búgin QR Parlamenti Senatynda ótken «Óńir» depýtattyq tobynyń otyrysynda vıtse-premer Ómirzaq Shókeev,
dep habarlaıdy QazAqparat.
«Oblys ákimderiniń málimetteri boıynsha, 2010 jyly respýblıkadaǵy barlyq túrdegi aýyl sharýashylyǵy daqyldaryn egý alańy 22,1 mln. gektardy quraıdy. Bul ótken jylǵymen salystyrǵanda 1 mln. gektarǵa artyq. Al 2010 jyly kóktemgi egis jumystary ýaqytynda dızeldik otynǵa suranys respýblıka boıynsha 336,2 myń tonnany quraıdy. Bul jetkizýshilermen tolyq qamtamasyz etiletin mólsher. Kóktemgi egis jumystaryn júrgizý barysynda aýyl sharýashylyǵy taýaryn óndirýshiler úshin aǵymdaǵy jylǵy naýryzdyń 1-inen mamyrdyń 31-ine deıin dızeldik otynnyń baǵasy bekitildi. Ol boıynsha munaı óńdeý bazasynan jetkizýshiler dızel otynyn lıtrine 55 teńgeden artyq baǵaǵa almaıdy. Al aýyl sharýashylyǵy taýarlaryn óndirýshilerge dızeldik otyndy satýdyń túpki baǵasy 62 teńgeden (lıtrine) asyp ketpeýi tıis», dedi Ó. Shókeev.
Onyń aıtýynsha, bul aýyl sharýashylyǵy taýarlaryn óndirýshiler úshin aýqymdy qoldaý bolyp tabylady.
