Kóktemgi egis: SQO-da tuqymdy jańartýǵa 1,6 mlrd teńge bólinedi
PETROPAVL. QazAqparat – Soltústik Qazaqstan oblysy eldegi tótenshe jaǵdaıǵa qaramastan kóktemgi egis jumystaryn atqarýǵa daıyn. Bul týraly Aýyl sharýashylyǵy basqarmasynyń basshysy Erbolat Bekshenov Óńirlik kommýnıkatsııalar qyzmetinde aıtty, dep habarlaıdy QazAqparat tilshisi.
SQO bıyl 4,2 mln ga alqapqa egin ekpek. Onyń 2,9 mln gektaryna bıdaı, 955 myń gektaryna maıly daqyldar, qalǵanyna kókónis pen jemazyq egiledi. Aýyl sharýashylyǵy basqarmasynyń jetekshisi Erbolat Bekshenovtyń aıtýynsha, óńir sharýalary tuqymmen tolyq qamtylǵan, al tehnıka 98 % daıyn.
«Kóktemgi egis jumystaryn atqarýǵa aýyl sharýashylyǵy taýaryn óndirýshilerge 68,9 myń tonna dızel, 10 myń tonna benzın, 3,2 myń motor maıy qajet. Bıyl memleket tolyq kólemde jeńildetilgen janar-jaǵar maıdy bóldi. Olar Atyraý jáne Pavlodar munaı óńdeý zaýyttarynan jetkiziledi. Lıtri, Memleket basshysynyń tapsyrmasyna sáıkes, 165 teńgeden aspaıdy», - deıdi E.Bekshenov.
Bıyl agrarly sektordy damytyp, aýyl sharýashylyǵyn sýbsıdııalaýǵa 42,8 mlrd teńge bólinbekshi. Kóktemgi egis jumystaryn qarjylandyrý maqsatynda «QazAgro» qarjy ınstıtýty jyl basynan 300 ótinishti qarap, 18,3 mlrd teńge berdi.
«Karantın jarııalanǵan kezde blokposttardy ótý boıynsha kóptegen, ıaǵnı tehnıkany jóndeý úshin servıstik kompanııalardyń aýdandarǵa shyǵýy, qosalqy bólshekterdi satyp alý máseleleri týyndady. Oblystyq ákimdikte jáne aýdandarda shtab qurylǵan. Blokposttardan ótý úshin iKOMEK saıty arqyly ótinim qaldyrýǵa bolady. Sondaı-aq qosalqy bólshek satatyn barlyq dúkenderdi ashý týraly sheshim qabyldandy. Servıstik kompanııalardyń tizimi jasalyp, ol blokposttarǵa berildi. Olar esh kedergisiz tehnıkany jóndeýge aýdandarǵa óte alady. Gerbıtsıd, mıneraldy tyńaıtqyshtar satatyn fırmalar da toqtaýsyz jumys isteıdi. Jalpy másele týyndaǵan jaǵdaıda aýyl sharýashylyǵy basqarmasynda qurylǵan Call-ortalyqqa habarlasýǵa bolady», - deıdi basqarma jetekshisi.
Erbolat Bekshenovtyń aıtýynsha, naýryz aıynda tuqymdy sýbsıdııalaýǵa qatysty jańa ereje qabyldandy. Sharýalar mamyr aıynan bastap sapaly, elıtalyq tuqymdarǵa jáne birinshi reprodýktsııalarǵa demeýqarjy ala alady. Bıdaı, raps, zyǵyr, kúnbaǵys sekildi maıly daqyldarǵa, kartopqa beriledi. Bul maqsatqa oblys bıýdjetinen 1,6 mlrd teńge qarastyrylǵan. Bıyl sondaı-aq sorttardyń da túrleri kóbeıtilmek. Byltyr bul kórsetkish – 8% bolsa, bıyl 8,7% jetkizilmek.
SQO-da ekologııalyq taza ónim óndiretin sharýashylyqtar qatary da artpaq.
«Byltyr Esil, Mamlıýt jáne M.Jumabaev aýdanynda tórt sharýashylyq aınalysty. Olar negizinen astyq pen zyǵyr ósirdi. Olarǵa óz ónimin eksporttaý úshin arnaıy sertıfıkat kerek, aýyl sharýashylyǵy taýaryn óndirýshilerde ol bar. Máselen «Voskresenovka» JShS bıdaı, zyǵyr, burshaq ósirýmen aınalysady. Sharýashylyq óz ónimin Germanııaǵa eksporttaıdy. Bıyl óńir jetekshisiniń tapsyrysyna saı egis alqaptary ulǵaıtylmaq», - dedi E.Bekshenov.
Byltyr 2 myń gektarda ekologııalyq taza ónim ósirilse, bıyl alqapty 7 myń gektarǵa jetkizý josparlanǵan. Osylaısha, qatarǵa taǵy 8 aýdan qosylmaq.
