Kóktemgi egis problemalary álemdegi oqıǵalarǵa baılanysty týyndap otyr - mınıstr
«Bıyl kóktemgi egis jumystaryn ýaqytyly jáne sapaly júrgizý boıynsha Memleket basshysynyń tapsyrmasyn oryndaý maqsatynda Aýyl sharýashylyǵy mınıstrligi birneshe ret oblys ákimdikterimen keńester ótkizdi. Onyń ishinde Memleket basshysynyń kóktemgi egisti ótkizýge aýyl sharýashylyǵy taýaryn óndirýshilerdiń daıyndyǵyn qaıta tekserý qajettiligi týraly tapsyrmasynan keıin óńirlermen fermerlerdiń tikeleı qatysýymen keńes ótkizildi. Árıne, problemalar bar, bul eń aldymen álemdegi oqıǵalarǵa baılanysty. Sonymen qatar, ákimdikter men fermerler egis naýqanyn ótkizýge daıyndyǵyn rastady», - dedi mınıstr ortalyq kommýnıkatsııalar qyzmetindegi baspasóz máslıhatynda.
Erbol Qarashókeevtiń atap ótýinshe, egis jumystaryn júrgizýge, aýyl sharýashylyǵy taýarlaryn óndirýshilerdi tuqymmen, agrohımııamen, tehnıkamen qamtamasyz etýge, qarjylandyrýǵa baılanysty barlyq máselelerdi úılestirý maqsatynda respýblıkalyq jedel shtab quryldy.
Onyń quramyna barlyq múddeli organdar men uıymdar, sondaı-aq oblystar ákimderiniń orynbasarlary kirdi.
«Egis naýqanyn júrgizý úshin aýyl sharýashylyǵy qurylymdarynda 144 myńnan astam traktor, 4,7 myń birlik ónimdiligi joǵary egis keshenderi, 77 myń tuqym sepkish, 221 myń topyraq óńdeý quraldary bar. Bir mezgilde birneshe tehnologııalyq operatsııalardy oryndaıtyn qazirgi zamanǵy egis keshenderin paıdalaný dándi daqyldar alańdarynyń 70 paıyzyn sebýdi júzege asyrýǵa múmkindik beredi. Atalǵan tehnıkanyń daıyndyǵy búginde shamamen 98 paıyzdy quraıdy. Egis jumystaryn jappaı júrgizýdi bastaýǵa daıyndyq 100 paıyzǵa qamtamasyz etiledi», - dedi Erbol Qarashókeev.