Kóktemgi egis naýqanyna bıýdjetten 60 mlrd. teńge bólinedi

ASTANA. QazAqparat - Kóktemgi egis naýqanyna respýblıkalyq bıýdjetten 60 mlrd. teńge bólinedi. Bul týraly búgin QR Aýyl sharýashylyǵy vıtse-mınıstri Saparhan Omarov málim etti.

Onyń sózi boıynsha, 2016 jyly kóktemgi egistik jumystaryn atqarý úshin sharýashylyqtarǵa shamamen 360 myń tonna dızel otyny qajet.

«Oblystardaǵy aldyn ala málimetterge qaraǵanda, 2016 jyly 21,6 mln gektar jerge egin egiledi dep josparlanýda. Bul ótken jylǵymen salystyrǵanda 413 myń gektarǵa kóp. Kóktemgi egin egý kezinde 18, 4 mln gektar alqapqa dándi daqyldar egiledi», - dep atap ótti vıtse-mınıstr.

Bunyń aldynda habarlaǵanymyzdaı, aǵymdaǵy marketıngtik jyly, 2016 jyly 1 aqpandaǵy jaǵdaı boıynsha, 4,9 mln. tonnaǵa jýyq astyq eksportqa jóneltildi. Bul ótken jyldyń sáıkes merzimimen salystyrǵanda, 24 paıyzǵa nemese 961 myń tonnaǵa kóp.