Kóktemgi dala jumystaryna tehnıkalardyń 98 paıyzy daıyn – AShM

NUR-SULTAN. QazAqparat – Aýyl sharýashylyǵy mınıstrligi kóktemgi dala jumystary bastalǵanǵa deıin tehnıkalardyń daıyndyǵyn 100 paıyzǵa jetkizýdi kózdep otyr, dep habarlaıdy QazAqparat tilshisi.

«Aýyl sharýashylyǵy tehnıkasynyń ázirligi týraly aıtar bolsaq, oblys ákimdikteriniń derekterine sáıkes osy jyldyń 7 sáýirindegi jaǵdaı boıynsha, kóktemgi dala jumystaryn júrgizýge aýylsharýashylyq tehnıkasynyń daıyndyǵy 98 paıyzdy quraıdy. Jumysty toqtatpaý úshin aýylsharýashylyq taýaryn óndirýshiler jóndeý brıgadalaryn jasaqtady. Servıstik kompanııalar olardyń kóshpeli servısti kúsheıtýi boıynsha, sondaı-aq qoımalardy qajetti qosalqy bólshektermen toltyrý jóninde tıisti jumystardy júrgizdi», - dedi Aýyl sharýashylyǵy vıtse-mınıstri Aıdarbek Saparov búgin Ortalyq kommýnıkatsııalar qyzmetinde ótken onlaın-baspasóz máslıhatynda.

Aıdarbek Saparovtyń aıtýynsha, jumys bastalǵanǵa deıin tehnıkalardy 100 paıyzdyq daıyndyqqa jetkizý kózdelgen.

«Kóktemgi egis jumystaryn ýaqytynda júrgizý úshin aqpan-maýsym aılaryna 387 myń tonna dızel otyny bólindi. 8 sáýirdegi jaǵdaı boıynsha bekitilgen kestege sáıkes 387 myń tonnanyń 119 myń tonnasyna sharttar jasalyp, onyń 103,4 myń tonnasy tıeldi. Agroónerkásiptik kesheniniń sýbektilerin qoldaý boıynsha is-sharalardy júrgizý úshin «Agrarlyq nesıe korporatsııasy» AQ-ǵa respýblıkalyq bıýdjetten 70 mlrd teńge kóleminde bıýdjettik nesıe bóldi. Bul ádettegiden 10 mlrd teńgege artyq. Sońǵy qaryz alýshylar úshin syıaqy mólsherlemesi jyldyq 5 paıyzdan aspaıdy», - deıdi ol.

Vıtse-mınıstrdiń málimetine sensek, qazirgi ýaqytta aýyl sharýashylyǵy taýaryn óndirýshilerdiń 54,4 mlrd teńge somasyna ótinimderi qarjylandyrylǵan.