Kóktemgi dala jumystaryna 40 mlrd. teńge nesıe qarastyrylyp otyr

ASTANA. QazAqparat - Aǵymdaǵy jyly 21,8 mln. gektar jerge aýyl sharýashylyǵy daqyldaryn ornalastyrý josparlanyp otyr, dep habarlady QR AShM baspasóz qyzmetinen.

Bul kórsetkish 2013 jylmen salystyrǵanda 1,5 %-ǵa artyq. Dándik daqyldar - 15,9 mln., maıly daqyldar - 2 mln., azyqtyq daqyldar - 3,4 mln., al kartop jáne kókónis-baqsha daqyldary 410 myń gektar jerge otyrǵyzylmaq.

Jazdyq egiske berilgen tuqym 99,3% qamtamasyz etilgen. Tuqym tapshylyǵy 16,9 myń tonna kóleminde kútilýde. Tuqym tapshylyǵy oblystardyń, sondaı-aq memlekettik resýrs esebinen tolyqtyrylmaq.

Gıdrometqyzmetiniń málimetterine saı kóktemgi dala jumystarynyń basynda respýblıka boıynsha topyraq ylǵaldylyǵy qanaǵattanarlyq dep kútilýde.

Sondaı-aq kóktemgi egis naýqanyn materıaldyq-tehnıkalyq jabdyqtaý jáne qarjylaı qamtamasyz etý máseleleri de sheshimin tapty.

Onyń ishinde, byltyrǵy jyldaǵydaı «Kazagro» Ulttyq holdınginiń enshiles uıymdary arqyly AÓK sýbektilerin nesıelendirý júzege aspaq. Bul sharaǵa 40 mlrd. teńge bıýdjettik nesıe kózdelip otyr. Onyń 14 mlrd. teńgesi ekinshi deńgeıli banktermen áleýmettik-kásipkerlik korporatsııalardyń kepildigine astyqty forvardtyq satyp alýǵa baǵyttalmaq. Qarjylandyrý 1 gektarǵa 6000 teńge esebinen júrgiziledi. Atalmysh baǵdarlamaǵa Kazagro qarjylyq ınstıtýttarynyń aldynda merzimi ótken bereshegi joq aýyl sharýashylyq taýar óndirýshiler jiberilmek.

Buǵan qosa, bıýdjettik nesıe qarajaty mıkrokredıttik uıymdar arqyly AÓK sýbektilerinen aýyl sharýashylyǵy ónimderin satyp alýǵa jáne AShTÓ keıin qarjylandyrý úshin baǵyttalady.

Qarjy bólýdiń ashyqtyǵyn qamtamasyz etý maqsatynda oblys ákimderine aýyl sharýashylyq taýar óndirýshilerdiń tizimin qalyptastyrý maqsatynda Úılestirý keńesterdiń jumystaryn uıymdastyrý qajet. Sondaı-aq ákimshilikter 2014 jyldyń 1 sáýirine deıin «Azyq-túlik kelisim shart korporatsııasy» UK» AQ aldynda áleýmettik-kásipkerlik korporatsııalardyń qaryzdaryn óteý boıynsha shara qabyldaýlary qajet. Eginshilik sharýashylyǵynyń barlyq salasyn sýbsıdııalaýǵa ú.j. 71,2 mlrd teńge, sondaı-aq kóktemgi-jazǵy qarjylandyrý arqyly memlekettik resýrsqa astyq satyp alýǵa 3,5 mlrd teńge bólinbek.

AShTÓ kóktemgi dala jumystaryn ótkizý úshin arzandatylǵan janar-jaǵarmaı qajetti 360 myń tonna kóleminde operatorlardyń shyǵyndaryn eskere otyryp, lıtrine 95 teńge esebimen usynylyp otyr.

Aýyl sharýashylyǵy tehnıkasyn daıyndaý jumystary jalǵasýda. Egin egý naýqanynda 3 myń birlik joǵary sapaly tehnıka qoldanylmaq.