Kóktemgi áskerge shaqyrý bastaldy
ASTANA. 24 naýryz. QazAqparat - Endi bir aptadan keıin elimizde Qazaqstan Respýblıkasy azamattaryn kóktemgi áskerge shaqyrý bastalady. Bul týraly QR Qorǵanys mınıstrliginiń baspasóz qyzmetinne habarlady.
"Jastardy Qarýly Kúshter qataryna sapaly túrde irikteý Qazaqstan armııasynyń jaýyngerlik ázirligin joǵary deńgeıge kóterýge yqpal etedi",- dep atap ótti Qorǵanys mınıstriniń birinshi orynbasary - Shtabtar bastyqtary komıtetiniń tóraǵasy general-polkovnık Sáken Jasuzaqov Almaty qalasy Qorǵanys isteri jónindegi departamentinde ótken eki kúndik oqý-ádistemelik jıynda.
Onyń aıtýynsha, ótken jyldardaǵy áskerge shaqyrý naýqanynyń nátıjesi kórsetip otyrǵandaı sapaly júrgizilgen jumys jaýyngerlik ázirliktiń de qarqyndy ósýine ári tıimdiligine qol jetkizip otyr.
Óz kezeginde jastardy áskerge shaqyrý komıssııalarynyń zańdylyqtardy saqtaı otyryp jumys isteýi sapaly kórsetkishke qol jetkizbek. Bul baǵytta uıymdastyrý-jumyldyrý organdarynyń qurylymynda áskerı basqarý organdary qyzmetkerleriniń jaýapkershiligin arttyrý jóninde jumystar únemi júrgizilip keledi.
Qazaqstan Respýblıkasynyń Qorǵanys mınıstri áskerge shaqyrýshylardyń bilim deńgeıiniń óskendigin birneshe ret atap ótken bolatyn. Ótken jyly áskerge shaqyrylǵandardyń kóp bóligi joǵary bilimi bar jastardan quraldy.
Almaty qalasy Qorǵanys isteri jónindegi departamentinde ótken eki kúndik oqý-ádistemelik jıynynda ásker túrleriniń, tekteriniń jáne óńirlik qolbasshylyqtardyń, áskerı basqarý organdarynyń, basqa da áskerlerdiń (áskerı qurylymdardyń) jumyldyrylýy men jabdyqtalýyna jaýapty laýazymdy tulǵalarmen ótken jylǵy jastardy kúzgi áskerge shaqyrý kezeńi qorytyndylanyp, taldaý jasaldy.
Sharaǵa qatysýshylarǵa QR QM ShBK Uıymdastyrý-jumyldyrý jumystary departamentiniń bastyǵy polkovnık Qaırat Myńjanov bıylǵy jylǵy kezekti shaqyrylymǵa tapsyrma berip, sonymen birge áskerı mindettilerdiń qujattaryn jasaý jáne oqý jıyndaryn uıymdastyrýdyń negizgi talaptaryn jetkizdi.
Jıynǵa qatysýshylar áskerı basqarý organdary men jergilikti atqarý organdary arsyndaǵy ózara is-qımyldy, dárigerlik komıssııalardy qajetti medıtsınalyq jabdyqtarmen qamtamasyz etýdi, sondaı-aq 2011 jyly áskerı mindettilermen oqý jıyndaryn ótkizý suraqtaryn talqylady.
Eske sala ketsek,ústimizdegi jylǵy 3 naýryzda «Belgilengen áskerı qyzmet merzimin ótkergen merzimdi áskerı qyzmettegi áskerı qyzmetshilerdi zapasqa shyǵarý jáne Qazaqstan Respýblıkasynyń azamattaryn 2011 jyldyń sáýir-maýsymynda jáne qazan-jeltoqsanynda kezekti merzimdi áskerı qyzmetke shaqyrý týraly» Qazaqstan Respýblıkasy Prezıdentiniń Jarlyǵyna qol qoıyldy.
