Kóktemgi ań-qus aýlaý maýsymy ashyldy
ASTANA. QazAqparat - Qazaqstan Respýblıkasy aýmaǵynda ań aýlaý erejesine sáıkes 2014 jylǵy 15 naýryzdan 15 mamyrǵa deıingi kezeńde sýda júzetin jáne orman qustaryn aýlaý 15 kúntizbelik kúnnen aspaıtyn merzimde júrgiziledi.
Bul týraly QR QOSRM baspasóz qyzmetinen habarlady.
Kóktem aılarynda úırektiń, jylqyshynyń, qurdyń, sańyraý qurdyń atalyqtaryn aýlaýǵa ruqsat etiledi. Úırek atalyǵyn aldamshy úırek nemese úırek tulyptaryn qoldanbaı aýlaýǵa qatań tyıym salynǵan.
Sondaı-aq kóktemde, 2014 jylǵy 15 sáýirden 15 mamyrǵa deıingi kezeń shegindegi 15 kúntizbelik kúnnen aspaıtyn merzimde qońyr aıýdyń (tıan-shan aıýynan basqa) atalyqtary men qysyr analyqtaryn aýlaýǵa ruqsat etiledi.
Óńirdiń tabıǵı-klımattyq jaǵdaılaryna baılanysty ýákiletti organnyń aýmaqtyq bólimsheleri ań aýlaý kezeńiniń ashylýy týraly jáne kóktemgi ań aýlaýdyń bastalý merzimin Erejede belgilengen merzim sheginde 15 kúntizbelik kúnge deıin shegerý týraly sheshimdi qabyldaıdy.
Osylaısha, búgingi kúni el boıynsha kóktemgi ańshylyq kezeń Jambyl jáne Mańǵystaý oblystarynda ashyldy.
Qoldanystaǵy zańnamaǵa sáıkes ań aýlaý tek ańshylyq sharýashylyqtary aýmaǵynda ǵana ruqsat etiledi. Qazaqstan Respýblıkasynda bekitilgen ańshylyq alqaptardyń kólemi shamamen 120 mln. gektardy quraıdy.
Qazirgi kezde respýblıkada 698 ańshylyq sharýashylyǵy jumys istep, qoryqshylar sany 2482 adamdy quraıdy, janýarlar dúnıesin qorǵaýǵa 2286 birlik avtomashına men basqa da tehnıka jumyldyrylǵan. Respýblıkada 130 myńǵa jýyq ańshy tirkelgen.
Áýesqoılyq (sporttyq) ań aýlaýdy júrgizý úshin: 1) ańshy kýáligi;
2) Qazaqstan Respýblıkasynyń salyq zańnamasy belgilegen memlekettik bajdyń tólengeni týraly túbirtek;
3) janýarlar dúnıesin paıdalanýǵa ruqsat;
4) ańshylyq sharýashylyǵy sýbektisiniń joldamalary;
5) ańshylyq atys qarýyn qoldaný arqyly ań aýlaý úshin - ańshylyq atys qarýyn saqtaý jáne alyp júrý quqyǵyn rastaıtyn Qazaqstan Respýblıkasy ishki ister organdarynda berilgen ruqsat;
6) aýshy jyrtqysh qustarmen ań aýlaý úshin - olardy tirkeý týraly qujattar bolǵan kezde jol beriledi.
En salynǵan (saqınalanǵan, mıkrochıptelgen) qustardy nemese sútqorektilerdi oljalaý kezinde olardyń aýlanǵan kúni men orny kórsetilgen aqparat, saqına, mıkrochıp jáne basqa da en belgileri ańshylyq sharýashylyǵy sýbektisiniń ýákiletti tulǵasyna nemese QR QOSRM Orman jáne ańshylyq sharýashylyǵy komıtetiniń oblystyq aýmaqtyq ınspektsııalaryna tapsyrylýy tıis. Keıin olar Qazaqstan Respýblıkasy Bilim jáne ǵylym mınıstrligine (ǵylym men ǵylymı-tehnıkalyq qyzmet salasyndaǵy basshylyqty júzege asyratyn ýákiletti memlekettik organ) beriledi.
Ań aýlaý barysynda ańshylyq alqaptardy turmystyq jáne kásipshilik qaldyqtarymen, tastandy zattarmen lastaýǵa jol berilmeıdi.
Qazaqstan Respýblıkasynyń «Janýarlar dúnıesin qorǵaý, ósimin molaıtý jáne paıdalaný týraly» zańynyń 38-babynyń 5-tarmaǵynyń jáne Qazaqstan Respýblıkasynyń aýmaǵynda ań aýlaý erejesiniń talaptaryn oryndamaǵandar Qazaqstan Respýblıkasynyń Qylmystyq kodeksi men Ákimshilik quqyq buzýshylyq týraly kodeksinde qarastyrylǵan jaýapkershilikke tartylady.
