Kóktemgi tasqynǵa daıyndyq: Aqtóbede ákimdikter qaıyq pen dron satyp alyp jatyr
AQTÓBE. KAZINFORM – Aqtóbe oblysynda 58 eldimeken sý basý aýmaǵynda tur. Qazirgi kezde aýdan ákimdikteri qaıyq pen qum toltyrýǵa arnalǵan qap satyp alyp jatyr.
Byltyrǵy sý tasqyny kezinde materıaldyq shyǵynǵa ushyraǵan aýdandarda qazir jappaı satyp alý jumystary júrip jatyr. Olar aldyn ala ózenderderi muzdy jaryp, qum toltyrýǵa qajetti qapty túgendedi. Kazinform byltyr jergilikti deńgeıde tótenshe jaǵdaı jarııalanǵan 6 aýdandy saralap kórdi. Máselen, Muǵaljar aýdany 7,3 mln teńgege qaıyq satyp aldy. Sonymen birge konkýrsta jeńip alǵan kásipker 2 myń qapty 432 myń teńgege jetkizip berýge kelisken.
Qobda aýdanynda qum toltyrýǵa arnalǵan 30 myńnan astam qap satyp alyndy. Memlekettik satyp alý kezinde 2,4 mln teńge usynylǵanymen, jeke kásipker 1,1 mln teńgege kelisim bergen. Sonymen birge 2 dana motopompaǵa 840 myń teńge qarastyryldy. Aýdan ákiminiń apparaty kóktemgi sý tasqynyna daıyndyq kezinde 2 dronǵa da tapsyrys berip, 1,8 mln teńge shyǵardy. Taǵy 10 motosorǵy, 336 tósek-oryn, 9650 qap satyp alýǵaǵa konkýrs jarııalap, 8,5 mln teńge qarastyryldy.
Yrǵyz aýdany bolsa bıyl muz jarý jumystaryna 10 mln teńge usynyp otyr. Qazirgi kezde Memlekettik satyp alý júrgizilip jatyr. Eki motosorǵyǵa tapsyryp berip, 304 teńge jumsady.
Oıylda muz jarý jumystaryna 8 mln teńgeden astam qarjy jumsalady. Qazirgi kezde Memlekettik satyp alý konkýrsy ótti. Mundaı konkýrs aqpanda ótti, naýryzǵa da josparlanǵan.
Áıteke bı aýdanynda da muz jarý jumystary qarastyrylǵan. Munda 5,8 mln teńge qarastyryldy. Sonymen birge 1 myń dana qap satyp alýǵa 1 mln teńgeden astam qarjy jumsaldy. Ár qap bul aýdanda 106 teńge dep baǵalanyp otyr.
Temir aýdanynda motosorǵy, qum salýǵa arnalǵan 2 myń qap aldy. Monosorǵynyń ár danasyn 84 500 teńge dep baǵalap, jeńimpaz 10 danasyn jetkizýge kelisim bergen. Al 2 myń qapty alýǵa 710 myń teńge jumsady.
Eske salsaq, Aqtóbede 58 eldimeken sý basý aýmaǵyna tur. Aqtóbe oblystyq TJD baspasóz qyzmetiniń habarlaýynsha, 9 jedel avtomobıl, 2 kvadrotsıkl, 15 motorly úrlemeli qaıyq, 340 sý ótkizbeıtin kombınezon, 44 tasymaldaý motopompasy, 3 tirkeme motopompasy, 1 súńgýir avtomobıli, 2 qutqarý qaıyǵy, 14 súńgýirlerge arnalǵan tynys alý apparaty, 2 ushqyshsyz ushý apparaty satyp alyndy. Bul daıyndyqqa jergilikti bıýdjetten 420 mln teńgeden astam qarjy bólingen.