Kóktemgi tasqyn sýyn tıimdi paıdalana almaı otyrmyz – Senat depýtaty

ASTANA. KAZINFORM – Kóktemgi tasqyn sýyn jazǵy qýańshylyqqa tıimdi paıdalaný kerek. Bul pikirdi Senat depýtaty Bıbigúl Jeksenbaı Úkimet saǵatynda aıtty.

− Búgin sý tasqyny qaýpine qarsy sharalar týraly tıisti mınıstrlikter málimetterdi keltirdi. Byltyrǵy úlken jaǵdaıdan sabaq alynǵany baıqalady. Olardyń bar problemalardy ashyq aıtqany qajet. Biz kútkendegideı tolyqqandy jaýap joq, biraq eń bastysy, jumys júrip jatyr. Onyń sebepteri de kóp, barlyq másele bıýdjetke kelip tireledi, 30 jyl boıy júrgizilmegen jumystar bar. Dál osy tabıǵı apattarǵa qarsy turatyn sharalardy, álemdik tájirıbelerdi kóbirek paıdalanýymyz kerek, − dedi B.Jeksenbaı agenttik tilshisine bergen suhbatynda.

Onyń aıtýynsha, Qazaqstan aýmaǵy sý tasqyny ǵana emes, qurǵaqshylyq qaýpi de bar memleketter qatarynda.

− Biz sý tapshylyǵy týraly jıi aıtamyz. Al kóktemgi sýdy tıimdi paıdalaný máseleleri áli nazarǵa alynbaı kele jatyr. Mol sý aǵyp keledi de, bárin jýyp-shaıyp ketedi. Al ony tıimdi paıdalansaq, sý basseınderin jasasaq, jańa tehnologııalardy qoldansaq, kóbirek paıdasyn kórýge bolar edi. Tipti iri qalalardy kógaldandyrýǵa paıdalana alar edik. Bul baǵytta Úkimetten usynys-bastamalar estı almadyq, − dedi depýtat.

Depýtat aıtqan taǵy bir másele – Qazgıdromet derekterine Úkimet pen jergilikti bıliktiń nazar aýdarmaıtyny.

− Byltyr da Qazgıdromet birneshe márte boljam jasady, biraq oǵan mán berilmegendikten kúrdeli jaǵdaı boldy. Bıyl kez kelgen boljamǵa durys nazar aýdarylady degen senimdemiz. Oǵan qosymsha, arnaıy Tasqyn tsıfrlyq júıesiniń qosylýy da oń nátıje beredi dep oılaımyz. Qandaı sharalar júrgizilse de, apattan 100 paıyz saqtandyrylatynyna eshkim kepildik bere almaıdy. Boljamdar bıyl da sý tasqyny qaýpi joǵary bolatynyn kórsetip otyr. Sondyqtan bul baǵytta úlken jumys atqarylýy kerek, − dep túıindedi B.Jeksenbaı.

Aıta keteıik, elimizdiń 4 mınıstrligi birlesip, sý tasqynyn boljaýǵa jáne modeldeýge múmkindik beretin Tasqyn aqparattyq júıesin ázirlep jatyr. Tasqyn júıesi boıynsha alǵashqy sý tasqyny boljamy aqpan aıynda jarııalanady.

Buǵan deıin Senat tóraǵasynyń orynbasary Jaqyp Asanov jyl saıyn tasqynnyń sebebimen emes, tek saldarymen kúrese bersek, eshqandaı bıýdjettiń aqshasy jetpeıtinin aıtqan edi.