Kóktemgi sý tasqyny: Pavlodar óńirinde 60 evakýatsııalyq pýnkt daıyndaldy

PAVLODAR. KAZINFORM — Qar kúrt erise, oblys boıynsha 50-den astam eldi meken qaýip kózinde qalýy múmkin. Baıanaýyl, Ertis, Jelezın, Aqtoǵaı, Tereńkól aýdandarynda sý tasqyny qaýpi joǵary.

Ertis-Baıan óńirinde sý tasqyny jaǵdaıy kúrdelengen jaǵdaıda áreket etý úshin energetıka, jol jáne kópir, ınjenerlik jáne kólik qyzmetterinen quralǵan kúshter men quraldar toby jasaqtaldy. Jalpy sany 1 871 adam, 769 ınjenerlik men arnaıy tehnıka, 21 júzý quraly jáne 357 motopompa daıyn tur.

— Sý tasqyny ýshyǵa qalǵan jaǵdaıda halyqty qabyldaýǵa arnalǵan, 22 745 adam syıatyn 60 evakýatsııalyq pýnkt daıyndaldy. Sondaı-aq tamaqtandyrý týraly 80 nıet sharty jáne Ertis pen Sileti ózenderinde (Aqqýly, Maı, Aqtoǵaı, Tereńkól aýdandary, Aqsý qalasy aýmaǵy) jarylys jumystaryn júrgizýge 5 shart jasaldy, — dep habarlady óńirlik tótenshe jaǵdaılar departamentinen.

Mamandardyń aıtýýynsha, Baıanaýyl, Ertis, Jelezın, Aqtoǵaı, Tereńkól aýdandary qaýpi joǵary aımaqtarǵa jatady. Maı, Aqqýly, Sharbaqty aýdandarynda, Aqsý qalasy men oǵan irgeles aýyldyq aımaqtarda ortasha qaýip kútiledi. 

Qazir jergilikti atqarýshy organdar qar tazalaý jáne shyǵarý jumystaryn uıymdastyryp jatyr. Qys mezgili bastalǵaly beri qala jáne aýdan ákimdikteri jalpy kólemi 1 mln 108 myń tekshe metr qar shyǵarǵan.

Buǵan deıin aýa raıyn boljaýshylar Pavlodarda qaýip baryn eskertken bolatyn.