Kóktemgi sý tasqynynan 5 adam qaza tapty

ASTANA. KAZINFORM – Kóktemgi sý tasqynynan 5 adam qaza tapty. Bul týraly ІІM resmı ókili Shyńǵys Alekeshev aıtty.

«Úıler men basqa da nysandardy sý basyp, dál sonyń saldarynan azamattardyń qaza bolý faktileri tirkelgen joq. Búgin BAQ-ta jáne áleýmettik jelilerde shyqqan osy máselege qatysty jarııalanymdar boıynsha túsindirip ótkim keledi. Jalpy, respýblıka boıynsha kóktemgi sý tasqyny barysynda 5 ólim faktisi tirkeldi. Atyraý oblysynda — 4, Aqtóbe oblysynda — 1 fakt. Olardyń arasynda kámeletke tolmaǵan balalar joq», — dedi ol Ortalyq kommýnıkatsııalar qyzmetindegi brıfıngte.

Onyń atap ótýinshe, atalǵan faktiniń barlyǵy qaýipsizdik talaptarynyń buzylýyna baılanysty. Máselen, bireýi óz betinshe ózendi júzip ótpek bolǵan. Al endi biri sý tasqynynyn keıin, ıaǵnı evakýatsııadan soń qaýipti aımaqqa oralýǵa tyrysqan. Barlyq fakti boıynsha tekserý bastalyp, tergeý júrgizilip otyr.

«Al Túrkistan oblysynda mundaı fakti múldem tirkelgen joq. Bul jerde Aqtóbe oblysyndaǵy jaǵdaı meńzelgen bolatyn. Onda kishkentaı bala oınap júrip taıaz sýǵa qulap, kóz jumǵan. Qaýipsizdik sharalaryn qatań saqtaýǵa, ýákiletti organdardyń zańdy talaptaryn oryndaýǵa, sondaı-aq memlekettik organdardyń jumysyna túsinistikpen qaraýǵa jáne olarǵa qol ushyn sozýǵa shaqyramyz», — dedi Shyńǵys Alekeshev.