Kóktemgi sý tasqynyna daıyndyq: ShQO-da 15 eldi mekendegi qaýip joıyldy
Shyǵys Qazaqstan oblysynda kóktemgi sý tasqynyna daıyndyq jumystary júrgizilýde, dep habarlaıdy Kazinform.
Oblys ákiminiń orynbasary Baqytjan Baıahmetovtyń tóraǵalyǵymen 2024 jylǵy sý tasqyny kezeńine daıyndyq máselesi boıynsha jınalys ótkizildi. ShQO TJD bastyǵynyń orynbasary Qýatbek Kenjebekuly óz sózinde arnaıy bekitilgen jumys josparynyń qalaı iske asyrylatynyn jetkizdi.
«Búgingi tańda 36 sharanyń 27-si iske asyryldy. Shyǵys Qazaqstan aýmaǵynda barlyǵy sý tasqyny qaýpi bar 71 eldi meken anyqtaldy. Tasqynǵa qarsy sharalardyń nátıjesinde, búgingi kúni 15 eldi mekende qaýip joıyldy, al 49-ynda barynsha azaıtyldy», - dedi ol.
Ahýal kúrdelene túsken jaǵdaıda jergilikti atqarýshy organdar men azamattyq qorǵaý qyzmetteri qurylymdarynyń jeke quramy men quraldary toptastyrylýǵa daıyn. Olardyń sapynda 2 334 adam, 735 tehnıka, 50 júzý quraly jáne 208 motopompa bar. Zardap shekken halyq úshin jalpy syıymdylyǵy 8 448 adamdy quraıtyn 89 ýaqytsha ornalastyrý pýnkti ázirlengen.
Keńes qorytyndysy boıynsha eldi mekenderden qardy qaýipsiz oryndarǵa ýaqtyly shyǵarý, profılaktıkalyq jarylys jumystaryn júrgizý úshin ýchaskelerdi anyqtaý, aryqtardy, káriz júıelerin, kólik jáne temirjoldar astyndaǵy sý ótkizý qurylystaryn tazartý boıynsha jaýapty mamandarǵa tapsyrmalar berildi.
