Kóktemgi sý tasqynyna daıyndyq: BQO-da taǵy eki aýdanda jumys kúsheıtildi
ASTANA. KAZINFORM – 5-6 aqpan kúnderi Batys Qazaqstan oblysynyń ákimi Narıman Tóreǵalıev Qaratóbe jáne Syrym aýdandaryna is-saparmen baryp, sý tasqynyna qarsy atqaralyp jatqan jumystardy tekserdi.
Qaratóbe aýdanynyń 9 eldi-mekeni (Qaratóbe, Shóptikól, Úshaǵash, Qorjyn, Egindikól, Shalǵyn, Sáýle, Sýlykól, Úshana aýyldary), sonymen qatar kórshiles ornalasqan Syrym aýdanynyń da 9 eldi-mekeni (Jympıty, Óleńti, Buldyrty, Qosoba, Jyraqudyq, Toǵanas, Ańqaty, Jetikól, Qyzylaǵash) oblystaǵy sý basý qaýpi bar eldi-mekender tizimine engizilgen.
Oblys ákimi qaýipti eldi-mekenderdegi bógetterdiń jaı-kúıin qarap, tehnıkalar men evakýatsııalyq pýnktterdiń ázirligine kóz jetkizdi.
Narıman Tóreǵalıev Qaratóbe aýdanynyń Úshana, Sýlykól, Úshaǵash aýyldaryna jáne aýdan ortalyǵyna baryp sý tasqynyna ázirlik barysyn qarady. Narıman Tóreǵalıev aýyldardaǵy qorǵanys bógetterin kúsheıtý, ózen arnalaryn bekitý jumystaryn sapaly júrgizý qajettigin aıtty.
Qaratóbe aýdanynda jalpy alǵanda, 9,8 km (Qorjyn, Qaratóbe, Úshaǵash, Sýlykól, Úshana) qorǵanys bógetteri ornatylǵan. Aýdan boıynsha 30-dan astam tehnıka bar.
Qaratóbe aýdany boıynsha 1430 adamǵa arnalǵan 19 evakýatsııalyq pýnkt uıymdastyrylǵan.
Aımaq basshysy Syrym aýdanynyń Qosoba aýylynyń mańynda jáne Jympıty aýylynda salynǵan qorǵanys bógetterine baryp, sondaı-aq jańadan salynyp jatqan Tótenshe jaǵdaılar bóliminiń ǵımaratyn kórdi.
Syrym aýdanynda sý qaýpi bar eldi mekenderdi qorǵaý baǵytynda 15 km qorǵanys bógetteri turǵyzylǵan. Sý tasqynynyń saldaryn joıýǵa 83 tehnıka qarastyrylǵan. Aýdanda 430 orynǵa laıyqtalǵan 9 evakýatsııalyq pýnkt bar.
- Biz sý tasqynynyń aldyn alýǵa muqııat daıyndalýymyz kerek. Barlyq jumys ýaqytyly ári sapaly oryndalýy tıis. Eń bastysy – turǵyndardyń qaýipsizdigin qamtamasyz etý. Ol úshin qajetti quraldar men tehnıkalardy tolyq daıyndap, sý deńgeıinde ózgeris bolǵanda, aýa raıy jylı bastaǵanda táýlik boıy kezekshilik uıymdastyrý qajet, - dedi oblys ákimi.
Oblys ákimi salaǵa jaýapty orynbasary B.Narymbetovke, aýdan ákimderine jáne jaýapty mekemelerge sý tasqynyna qarsy saqtyq sharalaryn kúsheıtip, jaǵdaıdy qatań baqylaýda ustaýdy tapsyrdy.