Kóktemgi sý tasqyny: ShQO-daǵy 20 ýchaskede muz keptelýi múmkin

ÓSKEMEN. KAZINFORM – Shyǵys Qazaqstanda kóktemgi sý tasqynynyń birinshi kezeńine daıyndyq jumystary júrgizilip jatyr.

Kópjyldyq baqylaýǵa sáıkes, sý tasqynynyń birinshi kezeńi ózenderde muz erı bastaǵan kezde, ıaǵnı naýryz aıynyń ekinshi onkúndiginiń sońynan sáýir aıynyń ekinshi onkúndiginiń aıaǵyna deıin baıqalady. Osy ýaqytta Qara Ertis, Úlbi, Buqtyrma, Kúrshim, Abylaıkıt, Aqsý ózenderinde muz keptelý qaýpi bar.

- Oblysta 1 aqpannan bastap joǵary daıyndyq rejımi engizildi. Tótenshe jaǵdaılar departamentinde jedel shtabtyń táýlik boıǵy kezekshiligi uıymdastyrylǵan. Sý basý qaýpi bar ár eldi meken boıynsha jergilikti atqarýshy organdardyń, qalalar men aýdandardyń tótenshe jaǵdaılar bólimderiniń jaýapty tulǵalary bekitildi, - dep habarlady departamentten.

Aqpan aıynyń úshinshi onkúndiginen bastap kanaldardy, aryqtardy, sý ótkizý qurylystaryn jáne kópirlerdi tazartý jumystary júrgizilip keledi. Búgingi tańda sý tasqynyna qarsy is-sharalardyń 84,4%-y oryndaldy. Atap aıtqanda kanaldardyń – 81,8%, aryqtardyń – 74,3%, sý ótkizý qurylystarynyń – 86,1%, kópirlerdiń 90%-y tazartyldy.

Eldi mekenderden 335 myń tekshe metr qar shyǵaryldy. 82 myń dana ydys-qap, 10,2 myń tonna ınertti materıal, 393 tonna janar-jaǵarmaı materıaldary daıyndaldy.

- Sý tasqynynyń aldyn alý maqsatynda 7 aýdan ákimdikterimen muz keptelisi bolýy múmkin 20 ýchaske anyqtaldy. Bekitilgen kestege sáıkes, Shemonaıha aýdanyndaǵy 2 ýchaskede, Marqakól aýdanyndaǵy 5 ýchaskede jáne Altaı aýdanyndaǵy 1 ýchaskede aldyn alý jumystary júrgizildi, - dep habarlady oblys ákimdiginen.

Ahýal kúrdelene qalǵan jaǵdaıda áreket etý úshin jergilikti atqarýshy organdardyń, Tótenshe jaǵdaılar departamentiniń jáne azamattyq qorǵaý qyzmetteri quramalarynyń 3677 adamnan turatyn, 556 tehnıka, 75 júzý quraly jáne 234 motopompalarmen qamtamasyz etilgen kúshteri men quraldary daıyndaldy.

Eske salsaq, osyǵan deıin SQO-da sý tasqyny kezeńine daıyndyq qalaı júrip jatqany jaıly jazǵanbyz.