Kóktemgi sý tasqyny: ShQO-da qazirgi ahýal qandaı
ÓSKEMEN. KAZINFORM – Shyǵys Qazaqstan oblysynda sý tasqynyna qarsy jumystar jalǵasyp jatyr.
Qazirgi ýaqytta oblystyń taýly aýdandarynda áli de qar kóp. Sý tasqynynyń ekinshi tolqyny bastalýda. Osyǵan baılanysty jergilikti atqarýshy organdar ózenderdiń arnalaryn tazartyp, túbin tereńdetip, jaǵalaýdy nyǵaıtý jumystaryn júrgizýde.
«Shyǵys Qazaqstannyń sý aıdyndarynda sý deńgeıiniń kóterilý deńgeıin anyqtap otyrý úshin baqylaý belgileri qoıyldy. Katonqaraǵaı aýdanyndaǵy Órel ózeniniń 1000 metr jaǵalaýy nyǵaıtyldy. Altaı aýdany Zýbovsk kentindegi Grebka ózende de jaǵalaýdy nyǵaıtý jumystary júrgizilip jatyr. Ózenderge ǵana emes, kólik joldaryna da erekshe nazar aýdarylǵan. Máselen, Glýbokoe aýdanyndaǵy oblystyq mańyzy bar Veselovka-Verh-Ýba jáne Óskemen-Taýly Úlbi-Soltústik tasjoldaryn qyzyl sý shaıyp ketýiniń aldyn alý boıynsha jumystar júrgizildi» dep habarlady ShQO TJD baspasóz qyzmetinen.
Jergilikti atqarýshy organdar, jol qyzmetteri jáne sharýa qojalyqtarynyń jumysshylary joldardyń bir bóligin topyraqpen toltyryp, nyǵyzdap, sý ótkizý qurylystaryn ornatty.
Avtojoldar qozǵalys úshin ashyq.
Altaı aýdanynda sý tasqynyna qarsy sharalarǵa QR TJM áskerı qyzmetshileri kómekke tartyldy.
Naýryz aıynan bastap olar 9 shaqyrym aryqtardy, tereńdigi 1-den 3 metrge deıingi 81 sý ótkizgish qurylysyn qardan tazartyp, 3 myńnan astam ydys-qapty tósedi.
