Kóktemgi egistikke daıyndyq: elde tuqymdy jappaı tekserý júrip jatyr

ASTANA. KAZINFORM — Tuqym daıyndaý tolyq kólemde qamtamasyz etilip, 2,3 mln tonnany qurady. Bul týraly Úkimet otyrysynda Aýyl sharýashylyǵy mınıstri Aıdarbek Saparov málim etti. 

— Egis naýqanyn sapaly ári ýaqtyly júrgizý úshin quny naryqtyq baǵadan 15% tómen bolatyn 402 myń tonna jeńildetilgen dızel otyny bólindi. Sharýalardy tuqymmen qamtamasyz etý jáne ony sebýdiń sapasyn tekserý monıtorıngine erekshe kóńil bólinip otyr. Oblys ákimdikteriniń málimeti boıynsha tuqym daıyndaý tolyq kólemde qamtamasyz etilip, 2,3 mln tonna boldy. Búginde 1,6 mln tonna tuqymnyń sapasyna saraptama júrgizildi, onyń nátıjesinde tuqymnyń 99%-y kondıtsııalyq bolyp tanylyp, sebý standartynyń birinshi jáne ekinshi synyptaryna sáıkes keledi, — dedi Aıdarbek Saparov.

Onyń aıtýynsha, tuqymdy jappaı tekserý sáýir aıynyń ortasyna deıin aıaqtalady. Tuqym sapasyn qamtamasyz etýde memlekettik qoldaýdyń róli erekshe. 15 aqpannan bastap tuqymdy sýbsıdııalaýdyń jańa tetigi kúshine endi, ol otandyq tuqym sharýashylyǵy sýbektilerin qoldaýǵa baǵyttalǵan.

Budan buryn habarlanǵandaı, bıyl jalpy egis alańy shamamen 23,8 mln gektar boldy.