Kóktemgi egis jumystaryna bólinetin janar-jaǵarmaıdy operatorlar kem ólsheıdi – pavlodarlyq fermerler

PAVLODAR. KAZINFORM — Sharýalardyń aıtýlarynsha, arzan dızel otynynyń sapasy da tómen. Al ony taratýshy-operatordy tańdaý múmkindigi joq. Bul týraly Pavlodar óńirlik kásipkerler palatasy dırektorynyń orynbasary Jomart Sembaev habarlady.

«Kásipkerler palatasynyń músheleri Jelezın jáne Tereńkól aýdandarynyń kásipkerlerimen kezdesip qaıttyq. Tereńkóldik «Sharov», «Lysov», «Ereke» sharýa qojalyqtary kóktemgi egis jumystaryna bólinetin janar-jaǵarmaıdyń sapasy únemi tómen bolatynyna ári taratýshy-operatorlardy tańdaý múmkindigi qarastyrylmaǵanyna shaǵymdandy. Fermerler suıyq otyndy operatorlar shamadaǵydan kem ólshep quıatynyna da narazylyq tanytty», deıdi J.Sembaev.

Jelezındegi «Jumabek Agro» ShQ ókilderi nesıeni óteý merzimin shegergennen keıin on eki aıdan beri nesıe ala almaı otyrǵanyn jetkizgen. Buǵan deıin Úkimet basshysy zańdaǵy mundaı normanyń joıylǵany týraly habarlaǵan edi. Alaıda qarjy uıymdary óz degenderin istep otyr.

«Al «Ata jer» ShQ paıdalanyp otyrǵan jerin jalǵa alǵany sebepti nesıe rásimdeı almaı otyrǵanyna, «Altyn jer» JShS astyq saqtaý qoımasy ınvestıtsııalyq jobasyn aıaqtaǵan soń sýbsıdııaǵa qol jetkize almaǵanyna shaǵymdandy. Sońǵy sharýashylyq sýbsıdııa alýy úshin 2022 jylǵy memlekettik saraptama qajet», dep atap ótti palata dırektorynyń orynbasary.