Kóktemgi egis jumystaryn júrgizý úshin jeńildetilgen qarjylandyrýǵa 580 mlrd teńge bólinedi

ASTANA. KAZINFORM - Úkimette vıtse-premer Serik Jumanǵarınniń tóraǵalyǵymen ótken keńeste kóktemgi dala jumystaryna jeńildetilgen qarjylandyrýdy bólý máseleleri qaraldy.

Talqylaýǵa aýyl sharýashylyǵy mınıstri Aıdarbek Saparov, «Agrarlyq nesıe korporatsııasy» AQ men «Báıterek» holdınginiń basshylyǵy qatysty.

Azyq-túlik korporatsııasynyń forvardtyq satyp alýy úshin 40 mlrd teńge, «Keń dala – 1» baǵdarlamasy boıynsha 140 mlrd teńge bólindi (147,3 mlrd teńge somasyna ótinimder kelip tústi, 121,3 mlrd teńge berildi). «Keń dala – 2» boıynsha qazirdiń ózinde 22,5 mlrd teńgege 295 ótinim qabyldansa, onyń 81-i jalpy 3,6 mlrd teńgege maquldanǵan. Bul rette aýyl sharýashylyǵy óndirýshileri tarapynan «Keń dala – 2» boıynsha jeńildikti qarajat bólý kezinde AKK tarapynan asyra kóterilgen talaptarǵa ótinishter kelip túsedi. Olardyń qatarynda: sońǵy úsh jyl ishinde egilgen alqaptar men egister týraly málimetterdi rastaý, menshiginde ne ýaqytsha óteýli paıdalaný quqyǵynda egis alqaptarynyń bolýy, aýyl sharýashylyǵy qyzmetiniń úsh jyldyq tájirıbesi, artyq ylǵaldan saqtandyrý jáne basqa da ótinishter bar.

«Kóktemgi dala jumystaryna bólinetin aqsha elimizdiń azyq-túlik qaýipsizdiginiń negizi jáne árbir suranysqa jeke-jeke qaraý kerek. Jaqyn arada Úkimet rezervinen jáne jergilikti bıýdjetterden paıyzdyq mólsherlemeni sýbsıdııalaý úshin 100 mlrd teńge bólinetin bolady, bul kóktemgi egis jumystaryna aýyl sharýashylyǵy taýarlaryn óndirýshiler úshin jyldyq 5%-ben qosymsha 400 mlrd teńge tartýǵa múmkindik beredi. Fermerler bul qarajatty kidirissiz alýy kerek», — dep atap ótti Serik Jumanǵarın.

2024 jyly kóktemgi egis jumystaryn qarjylandyrýdyń jalpy kólemi 580 mlrd teńgeni quraıdy. Bul aldyńǵy jyldarmen salystyrǵanda úsh esege kóp.