Kóktemgi egis jumystaryn erte qarjylandyrýǵa 1580-nen astam ótinish tústi
ASTANA.KAZINFORM - Bıylǵy maýsymdyq kóktemgi dala jumystaryn erte qarjylandyrý baǵdarlamasyn iske asyrý qarqyndy jalǵasyp jatyr. Baǵdarlamaǵa ótinim qabyldaý ótken jyldyń qazan aıynda bastalǵan bolatyn. Aýyl sharýashylyǵy taýar óndirýshileri úshin syıaqynyń túpki mólsherlemesi jyldyq 5%.
Aýyl sharýashylyǵy mınıstrligi málimetinshe, búgingi kúni 273 mlrd teńge kóleminde 2004 aýyl sharýashylyǵy taýar óndirýshilerin qamtıtyn pýl qalyptasty. Qazirdiń ózinde 1581 ótinim nazarǵa alynyp, 172,3 mlrd teńgege qarjylandyryldy, 2 mln gektardan astam egis alqaby qamtyldy.
Sonymen qatar nesıe somasynyń 85%-na deıin kepildik berýge jol ashatyn «Damý» qory arqyly qaryzdardy kepildendirý tetigi iske asyrylyp jatyr. Qazirgi ýaqytta 333 kepildik berildi, qaryz somasy 55 mlrd teńge.
Memleket basshysynyń kóktemgi dala jumystaryn ýaqytyly ári sapaly júrgizýdi qamtamasyz etý jónindegi tapsyrmasyn oryndaý aıasynda «Keń dala 2» baǵdarlamasy boıynsha ótinimderdi qabyldaý 1 qazanda bastalǵan.
Qarjylandyrýdy erte bastaý sharýalarǵa 2026 jylǵy egis naýqanyna aldyn ala daıyndalýǵa múmkindik beredi. Alynǵan qarajat janar-jaǵarmaı materıaldaryn tıimdi baǵamen satyp alýǵa, mıneraldyq tyńaıtqyshtar alýǵa, aýyl sharýashylyǵy tehnıkasyn jóndeýge jáne qajetti tuqym qoryn qalyptastyrýǵa baǵyttalady.
Jeńildetilgen qarjylandyrý kóktemgi dala jumystaryn daıyndaý men ótkizýge, sondaı-aq egin jınaý naýqanyna jáne maýsymdyq shyǵyndardy jabýǵa qoljetimdi. Qarajat elimiz boıynsha Agrarlyq nesıe korporatsııasynyń fılıaldyq jelisi jáne seriktes qarjy ınstıtýttary arqyly usynylady.
Keıingi jyldary aýadaǵy zııandy gazdardy azaıtý úshin karbon eginshiligi qoldanylyp júr. Qazaqstan osy baǵytqa bet bursa, saladan jylyna $35 mlrd tabys tabýy múmkin. Ekonomıkalyq paıda men ekologııalyq tıimdilikti toǵystyrǵan karbon eginshiligi degenimiz ne, Úkimet qandaı jobalardy qolǵa alady? Kazinform-nyń analıtıkalyq sholýshysy sarapshylarmen birge saýalǵa jaýap izdedi.