Kóktemgi egis jumystary: aýylsharýashylyq tehnıkalary 99% daıyn

ASTANA. KAZINFORM — Aldaǵy egis jumystaryna aýylsharýashylyq tehnıkalary 99% daıyn.

Bul týraly Úkimet otyrysynda Aýyl sharýashylyǵy mınıstri Aıdarbek Saparov aıtty.

— Aýyl sharýashylyǵy tehnıkasynyń daıyndyǵy boıynsha — 139 myń traktor, shamamen 5,6 myń birlik joǵary ónimdi egis kesheni, 71 myń sepkish, 141 myń topyraq óńdeý quraly bar. Óńirlerdiń aqparaty boıynsha tehnıkanyń daıyndyǵy shamamen 99% quraıdy, — dedi ol kóktemgi dala jumystary jaıly baıandamasynda.

Sondaı-aq mınıstr sharýalarǵa arzandatylǵan dızel bólingenin de atap ótti.

— Energetıka mınıstrligi aǵymdaǵy jyldyń egis naýqanyna 401 myń tonna arzandatylǵan dızel otynyn bóldi. Sharýalar úshin túpkilikti baǵa lıtrine 254 teńge quraıdy, bul naryqtan 15%-ǵa arzan. Qazirgi ýaqytta 237 myń tonna (59%) arzandatylǵan janar-jaǵarmaıǵa sharttar jasalyp, tólendi, onyń 218 myń tonnasy (54%) jóneltildi, — dedi Aıdarbek Saparov.

Osyǵan deıin elimizde egis alqabynyń jalpy kólemi 23,7 mln gektarǵa jetkeni belgili boldy.

Sonymen qatar bıyl 580 myń tonnaǵa jýyq erte pisetin kókónis jınalatyny habarlandy.

Budan bólek búgingi tańda kóktemgi dala jumystaryna daıyndyq aıasynda 6,1 myń sharýaǵa 384,8 mlrd teńge jeńildetilgen nesıe berilgeni anyqtaldy.