Kóktemgi egis jáne egin jınaý jumystaryna 1,5 trln teńge qajet

ASTANA. KAZINFORM – Kóktemgi egis jáne egin jınaý jumystaryna 1,5 trln teńge qajet. Bul týraly Úkimet otyrysynda Aýyl sharýashylyǵy mınıstri Aıdarbek Saparov aıtty.

«Egis jumystaryn qarjylandyrý mańyzdy másele sanalady. Memleket basshysynyń tapsyrmalaryn eskere otyryp, sapaly tuqym, tyńaıtqysh, pestıtsıdter, janar-jaǵarmaı jáne taǵy basqalardy qoldaný sııaqty agrotehnıkalyq sharalardy eskere otyryp, kóktemgi egis jáne egin jınaý jumystaryn sapaly júrgizý úshin jeńildetilgen kredıt berýge shamamen 1,5 trln teńge qajet», - dedi mınıstr.

Aıdarbek Saparovtyń aıtýynsha, bıyl «Keń-dala» baǵdarlamasy aıasynda 140 mlrd.teńgege qarjylandyrý kózdelgen. Sondaı-aq forvardtyq satyp alý baǵdarlamasy jalǵasýda. Bıyl ol 40 mlrd teńgeni quraıdy. Qalǵan qarajatty basqa qarjylandyrý kózderinen qarastyrý. Onyń ishinde jergilikti bıýdjetten 100 mlrd teńge bólý máselesi pysyqtalyp jatyr. Bul kóktemgi egis jumystaryna qosymsha 425 mlrd teńge jeńildetilgen kredıtter tartýǵa múmkindik beredi.

«Kóktemgi egis naýqanyn ótkizý máselesi mınıstrliktiń erekshe baqylaýynda. Barlyq problemalyq másele mınıstrliktiń jedel shtabynyń otyrystarynda qaralatyn jáne sheshiletin bolady. Qabyldanǵan sharalar egis naýqanyn sapaly jáne ońtaıly agrotehnıkalyq merzimde júrgizýge múmkindik beredi», - dedi ol.