Kóktemgi áskerge shaqyrý: SARBAZ+ jobasy ótinimdi onlaın qabyldaıdy
ASTANA. KAZINFORM – Áskerge shaqyrý naýqany kezinde jastarǵa myarmy.kz platformasy arqyly merzimdi qyzmetke onlaın ótinim tapsyrý múmkindigi berilip otyr.
Qorǵanys mınıstrligi málimetinshe, bul bastama búginde shaqyrylýshylar arasynda úlken qyzyǵýshylyq týdyryp otyrǵan SARBAZ+ jobasy aıasynda júzege asyrylmaq.
Ótinim berý úshin saıtqa kirip, qyzmet sharttarymen tanysyp, tıisti formany toltyrý jetkilikti. Odan keıin júıe úmitkerdi barlyq kezeń boıynsha avtomatty túrde baǵyttaıdy.
Aldymen qabyldanǵan ótinim muqııat tekseriledi. Sodan soń áskerı komıssarıatqa medıtsınalyq tekserýden ótý úshin shaqyrý keledi. Keıin áskerı bólim ókilderimen áńgimelesý ótkiziledi. Sonyń nátıjesinde úmitkerdi qabyldaý nemese bas tartý týraly sheshim shyǵarylady. Barlyq kezeń túsinikti ári ashyq, al qajetti qujattar tizimi saıtta kórsetilgen.
SARBAZ+ jobasynyń basty ereksheligi – jastarǵa zamanaýı daǵdylardy úıretý. Qyzmet barysynda sarbazdar tek oqý-jaýyngerlik tapsyrmalardy oryndap qana qoımaı, suranysqa ıe mamandyqtardy meńgerip shyǵady. Joba ózekti baǵyttar boıynsha maman daıarlaýǵa barynsha basymdyq beredi.
Rtel oqý synyptarynda áskerı qyzmetshiler radıobaılanysty meńgerip, Ashik Aspan baǵdarlamasy arqyly drondardy basqarýdy úırenedi. Budan bólek Eltex zamanaýı tehnologııalyq júıelerimen jumys isteýge beıimdeledi. Sonymen birge olar kıberqaýipsizdik jáne derekterdi qorǵaý negizderin oqıdy, jasandy ıntellekt elementterimen tanysyp, tsıfrlyq platformalar arqyly aǵylshyn tilin jetildiredi.
Áskerı bólimde qyzmet etýge qolaıly jaǵdaı jasalǵan. Sport alańdary, jattyǵý zaldary, belsendi demalys aımaqtary jáne elektrondy tır jumys isteıdi.
Sondaı-aq beıneanalıtıka júıesi, «Aı-sulý» boty jáne ARMIA.KZ platformasy sııaqty qoldaý servısteri jumys isteıdi.
Atalǵan jobaǵa qyzyǵýshylyq joǵary. Qazirgi tańda 268 ótinim berilgen. Onyń 90-ǵa jýyǵy irikteldi. Bir orynǵa shamamen úsh adamnan keledi. Oryn sany shekteýli bolǵandyqtan, úmitkerlerdiń bári birdeı qabyldanbaıdy.
SARBAZ+ jobasy merzimdi áskerı qyzmettiń tek mindet qana emes, bolashaq mamandyqqa qajetti daǵdylardy ıgerýdiń naqty múmkindigi ekenin kórsetip otyr.
Aldaǵy ýaqytta jobany keńeıtip, basqa áskerı bólimderge engizý josparlanyp otyr. Qazirgi áskerge shaqyrý kezeńinde merzimdi qyzmetten ótý úshin eń qoljetimdi ári yńǵaıly tásilderdiń biri – onlaın ótinim berý jetkilikti bolyp otyr.
