Kóktemgi áskerge shaqyrý: Qazaqstan Qarýly kúshteri tolyq jasaqtaldy
ASTANA. KAZINFORM – Elimizde Prezıdent Jarlyǵyna sáıkes 2026 jylǵy 17 naýryz ben 30 maýsym aralyǵynda ótetin kóktemgi áskerge shaqyrý naýqany áli jalǵasyp jatyr. Bul týraly Qorǵanys mınıstrligi habarlady.
1 maýsymdaǵy jaǵdaı boıynsha Qarýly kúshterdi, sondaı-aq UQK Shekara qyzmetin, Memlekettik kúzet qyzmetin jáne Tótenshe jaǵdaılar mınıstrligin jasaqtaý jospary tolyq kólemde oryndaldy.
Bas shtabtyń Uıymdastyrý-jumyldyrý jumystary departamentiniń málimetinshe, jańa shaqyrylǵandardyń basym bóligi jas sarbazdar kýrsyn aıaqtap úlgergen. Áskerı qyzmetshiler jalpyáskerı jarǵylardy oqyp, saptyq jáne atys daıyndyǵynyń negizderin meńgergen, qarý-jaraqtyń taktıkalyq-tehnıkalyq sıpattamalarymen tanysqan. Daıyndyqtyń qorytyndy kezeńi retinde saltanatty túrde áskerı ant berý rásimi ótkizildi.
Qazirdiń ózinde merzimdi qyzmettiń sarbazdary áskerı ómirge sátti beıimdelip, óz mindetterin atqarýǵa kiristi. Nesıe mindettemeleri bar áskerı qyzmetshiler zańnamada qarastyrylǵan múmkindikti paıdalanyp, qyzmet etý merziminde tólemderi keıinge qaldyryldy. Sonymen qatar olardyń kópshiligi qyzmetin aıaqtaǵannan keıin memlekettik bilim berý granttaryna arnalǵan konkýrsqa qatysýdy josparlap otyr.
Qazir el óńirlerinde ákimderdiń orynbasarlarynyń basshylyǵymen qalalyq jáne aýdandyq áskerge shaqyrý komıssııalary óz jumysyn jalǵastyryp jatyr. Negizgi kúsh Ulttyq ulan bólimshelerin jasaqtaýǵa baǵyttalǵan. Josparǵa sáıkes, onyń qataryna 7 myńnan astam jas shaqyrylatyn bolady.
Azamattarǵa shaqyrý elektrondy formatta SMS-habarlamalar jáne eGov portaly arqyly kelý kúnine keminde úsh kún qalǵanda jiberiledi. Elektrondyq habarlama resmı shaqyrý mártebesine ıe. Habarlama alǵan azamattar jergilikti atqarýshy organdardyń áskerge shaqyrý pýnktine kelýge mindetti. Dáleldi sebepsiz kelmegen jaǵdaıda ákimshilik jaýapkershilik, al áskerı qyzmetten júıeli túrde jaltarǵany úshin qylmystyq jaýapkershilik qarastyrylǵan.
Jalpy kóktemgi áskerge shaqyrý aıasynda Qazaqstan Respýblıkasynyń Qarýly kúshteri, basqa da áskerleri men áskerı quralymdarynyń qataryna 18 ben 27 jas aralyǵyndaǵy 21 myńnan astam azamat qosylady.
Qurlyq áskerlerinde úsh myńnan asa sarbaz Otanǵa adal bolýǵa ant bergenin jazǵan edik.
