Kóktemgi ańshylyq: qandaı qustardy atýǵa ruqsat bar
PETROPAVL. KAZINFORM - Soltústik Qazaqstan oblysynda kóktemgi ańshylyq maýsymy aldynda mamandar qaýipsizdik pen zań talaptaryn qatań saqtaý qajettigin eskertti.
Óńirde ańshylyq maýsymy resmı túrde 25 sáýirde ashylyp, 9 mamyrǵa deıin jalǵasady.
SQO Orman sharýashylyǵy jáne janýarlar dúnıesi aýmaqtyq ınspektsııasynyń málimetinshe, bul aralyqta úırektiń jáne qurdyń atalyǵyn ǵana atýǵa ruqsat bar. Qoldanystaǵy erejelerge sáıkes, áýesqoı ańshylyqpen aınalysý úshin ańshyda mindetti túrde birqatar qujat bolýy tıis. Atap aıtqanda, ańshy kýáligi, janýarlar dúnıesin paıdalanýǵa ruqsat, ańshylyq sharýashylyǵy sýbektisi beretin joldama, al qarý qoldanǵan jaǵdaıda - azamattyq qarýdy saqtaý jáne alyp júrýge arnalǵan ruqsat qujaty talap etiledi.
- Qustardy aýlaýdyń tártibi bar. Máselen úırektiń atalyǵyn aýlaý kezinde mindetti túrde qustyń tulyby sııaqty quraldardy paıdalaný qajet. Ushyp bara jatqan qustar tobyna oq atýǵa bolmaıdy. Qyzyl kitapqa engen úırek túrlerin aýlaýǵa tyıym salynǵan. Sonymen qatar kóktemde qazdyń barlyq túrine ańshylyq jasaýǵa bolmaıdy. Ańshylyq aıaqtalǵannan keıin, sondaı-aq bir orynnan ekinshi orynǵa aýysý kezinde qarý mindetti túrde oqtan bosatylǵan kúıde bolýy qajet, - deıdi ınspektsııanyń bólim basshysy Oleg Bespalov.
Qazirgi tańda SQO-da 20-dan astam sýbektige tıesili 46 ańshylyq sharýashylyq jumys isteıdi. Joldamalardy osy sharýashylyqtardan alýǵa bolady. Bıyl oblys boıynsha shamamen 2 myń úırek jáne 600-ge jýyq qurdy atýǵa ruqsat etilgen.
Mamandar erejelerdi buzǵandarǵa ákimshilik jaýapkershilik bar ekenin eskertedi. Qazaqstan Respýblıkasynyń Ákimshilik quqyq buzýshylyq týraly kodeksiniń 382-babyna sáıkes, mundaı jaǵdaıda jeke tulǵalarǵa eskertý jasalady nemese 5 AEK mólsherinde – 21 myń teńge shamasynda aıyppul salynady. Al zańsyz ań aýlaý faktisi tirkelgen jaǵdaıda, keltirilgen shyǵyndy óteý týraly talap qosymsha qoıylady.
Buǵan deıin SQO men Aqmola oblysynda 15 sáýirden bastap balyqtyń keı túrlerin aýlaýǵa tyıym salynatyndyǵyn jazǵan edik.