Kóktemde Tájikstannan Qazaqstanǵa 6 myń tonna pııaz jetkiziledi
Qazaqstandyq bıznes-delegatsııa men saýda jelileriniń ókilderi otandyq naryqqa aýylsharýashylyǵy ónimderin jetkizý týraly kelisimder jasaýǵa Tájikstanǵa jumys saparymen bardy.
«Hatlon oblysy tóraǵasynyń mindetin atqarýshy Davlatalı Saıdpen kezdesýde Qazaqstanǵa aýyl sharýashylyǵy ónimderin jetkizý máseleleri talqylandy. Nátıjesinde maýsymaralyq kezeńde 6 myń tonna kóleminde erte pisken pııazdy kepildendirilgen túrde jetkizý kelisimderine qol qoıyldy. Tájik tarapy bul ónimderdi temirjol arqyly tasymaldaýǵa tarıftik jeńildik jasap otyr», - dedi «QazTrade» caýda saıasatyn damytý ortalyǵynyń bas dırektory Nuraly Bókeıhanov.
Sondaı-aq, spıker Qazaqstanǵa aýyl sharýashylyǵy ónimderin jetkizýdiń qosymsha kólemi pysyqtalyp jatqanyn aıtty.
Jumys saparynda qazaqstandyq bıznes-delegatsııa pııaz egilgen alqaptardy qarap shyqty. Tájikstannyń aýylsharýashylyǵy óndirýshileri sapaly ónimdi ýaqtyly jetkizýge ýáde berip otyr. Hatlon oblysynda pııaz jınaý sáýir aıynyń ortasynda bastalady. Bul áleýmettik mańyzy bar ónim qazaqstandyq sórelerge sáýir aıynyń sońy men mamyr aıynyń basynda túsedi.
QR Aýyl sharýashylyǵy mınıstrliginiń málimetinshe, qazaqstandyqtar aıyna shamamen 25-30 myń tonna pııaz tutynady. Qazirgi ýaqytta elimizde osy ónimniń qory – 152,4 myń tonna.
Esterińizge sala keteıik, Qazaqstanda pııazǵa ishki suranysty qamtamasyz etý maqsatynda kórshiles elderden aýyl sharýashylyǵy óniminiń jańa ónimi túskenge deıin úsh aı merzimge eksportqa ýaqytsha tyıym salynady.
Aıta keteıik, Qazaqstannan pııaz eksporttaý úsh aıǵa toqtatyldy. Fermerler úshin pııaz eksportyna tyıym salýdyń jaǵymsyz saldaryn azaıtý maqsatynda aýyl sharýashylyǵy taýaryn óndirýshilerden pııazdy ÁKK arqyly turaqtandyrý qorlaryna, sondaı-aq saýda jelileri arqyly aınalym shemasy arqyly satyp alýdyń túrli tetikteri iske asyrylyp jatyr.