Kóktemde sý tasqyny bolýy múmkin óńirler ataldy

ASTANA. KAZINFORM – QR Tótenshe jaǵdaılar vıtse-mınıstri Kegen Tursynbaev elimizdiń qaı óńirlerinde kóktemde sý tasqyny qaýpi bar ekenin aıtty.

- Qazirgi kezde Tasqyn júıesi arqyly qaýip aımaǵyndaǵy bes óńir aıqyndaldy. Olardyń qatarynda Soltústik Qazaqstan, Aqmola, Shyǵys Qazaqstan, Abaı jáne Qaraǵandy oblystary bar. Osy óńirlerdegi jaǵdaıdy kúndelikti formatta baqylap otyrmyz. 1 naýryzdan beri táýlik boıy jumys istep turǵan jedel shtab quryldy. Sondyqtan jergilikti atqarý organdarymen birge barlyq eskertý sharalary jasaldy. Budan bólek, tıisti ınjenerlik jumystar da atqaryldy. Qazir eldi mekenderge qatysty qaýip joq. bizdiń kúsh qurylymdar tolyq ázirlikte tur, - dedi K.Tursynbaev Senatta tilshiler suraǵyna jaýap bere otyryp.

Onyń aıtýynsha, atalǵan bes óńirde qar qalyń túsken jáne qatyp qalǵan topyraq qalyńdyǵynyń deńgeıi nazarǵa alynyp otyr. Osy oraıda jasalǵan tıisti taldaýdyń nátıjesinde bul oblystar qaýipti aımaqtardyń qataryna endi.

Buǵan deıin habarlanǵandaı, elimizdiń óńirlerinde sý tasqynyna daıyndyq sharalary jalǵasyp jatyr.